Þúsund plötur farnar og sér ekki högg á vatni

„Klukkan hálf ellefu í morgun stóðu fimmtíu manns í röð fyrir utan og biðu," segir Arnar Eggert Thoroddsen, sem ákvað að grisja plötusafnið sitt svo hann kæmist til útlanda í nám og heldur af þeim sökum garðsölu í dag.

Arnar segir að þegar hafi nokkur hundruð manns litið við og verslað tónlist, en salan hófst klukkan ellefu í morgun. „Það sér ekki högg á vatni hérna," segir hann en telur þó að um þúsund tiltlar séu þegar seldir.

Salan fer fram í garðinum hjá Arnari að Auðarstræti 13 og stemningin í morgun er búin að vera til fyrirmyndar. „Það komu nokkrir dropar úr lofti áðan en annars er bara gott karma hérna," segir hann.

Garðsalan mun standa til fimm í dag og aftur frá ellefu til fimm á morgun.