Vopnfirðingar moka upp makríl-milljörðum

Makríl-, síldar- og loðnutekjur Vopnafjarðar stefna í yfir átta milljarða króna á þessu ári. Þetta er sú byggð sem er með einna hæstu gjaldeyristekjur á íbúa á Íslandi og þar hefur verið líf og fjör að undanförnu.

Í gamla daga var talað um síldarævintýri, svo kom loðnuævintýri og nú er hægt að tala um makrílævintýri á Vopnafirði. Þvílík hafa umsvifin verið í þessu 670 manna byggðarlagi. Fiskiskip HB Granda, Faxi, Ingunn og Lundey, hafa í sumar og haust landað bæði makríl og síld og í vetur, þegar loðnan fer að ganga, bætist við fjórða skipið, Víkingur.

Í fiskvinnsluhúsum Vopnafjarðar hafa allt að 170 manns haft atvinnu af því að flaka makríl og síld, heilfrysta eða bræða í mjöl og lýsi. Magnús Róbertsson, vinnslustjóri HB Granda á Vopnafirði, lýsir í viðtali í fréttum Stöðvar 2, þessum miklu umsvifum og nefnir sem dæmi að 1.200 tonnum hafi verið skipað upp í gær af frystum afurðum, daginn áður hafi mjölskip verði í höfninni og daginn þar áður lýsisskip. Stundum séu 2-3 útskipanir í viku af frosnum afurðum.

Hjá HB Granda áætlar forstjórinn, Vilhjálmur Vilhjálmsson, að útflutningsverðmæti frá Vopnafirði fari yfir átta milljarða króna í ár. Mikil uppbygging þar undanfarin átta ár er grunnurinn að þessari miklu verðmætasköpun en fyrirtækið hefur undanfarin átta ár sett yfir fjóra milljarða króna til að efla vinnslu uppsjávarfisktegunda, sem Vopnfirðingar segja að hafi reynst heillaskref fyrir byggðina.

„Það er búin að vera stöðug uppbygging frá því HB Grandi kom á Vopnafjörð," segir Magnús Robertsson en þeirri uppbyggingu fari brátt að ljúka.

„En þetta er búið að vera alveg ævintýri fyrir okkur á Vopnafirði," segir Magnús. „Þetta er gríðarleg lyftistöng fyrir Vopnafjörð og Vopnfirðinga."