Til að forðast þynnku og viðbjóð

Snædís Ragnarsdóttir módel-fitness keppandi mælir með að ferðalangar sem vilja huga að heilsunni taki með sér hollt snakk í fríið yfir verslunarmannahelgina.

„Verslunarmannahelgin er ein af þeim helgum sem mér leyfist að kalla sukk-helgi og fólk á það til að leyfa sér aðeins of mikið þar sem drykkjan tekur öll völd og fólk er oftar en ekki að drekka gífurlegt magn af kaloríum. Ég mæli nú samt með því að fólk reyni að huga að heilsunni eftir bestu getu, þrátt fyrir drykkju og húllumhæ," segir Snædís áður en hún segir okkur hvað er hollt að hennar mati.

„Til þess að forðast þynnku og viðbjóð mæli ég með því að fólk reyni að borða næringaríkan mat og sleppi því að blanda drykkina með sykurleðju. Hollt „snakk" og drykkir er eitthvað sem fólk ætti að taka með sér í ferðalagið."

Snakk og heilsunammi

„Hnetur. Allar hnetur eru hollar en samt sem áður ætti að borða þær í hófi þar sem þær innihalda mikið af fitu, þær eru ríkar af ómega fitusýrum og e-vítamínum. Það er mjög gott að rista hnetur með smá salti og hunangi, gott snakk."

„Poppkex, bæði gott eitt og sér og með smá súkkulaði. þá er líka gott að setja smá hnetusmjör á og banana. Ávextir, þurrkaðir og ferskir. Innihalda mikið af vítamínum ásamt því að vera stútfullir af hollri orku. Dæmi: rúsínur, döðlur, bananar, sveskjur, jarðaber, mangó, ananas og epli."

„Hrökkbrauð og flatkökur, fullt af trefjum og vítamínum."

Mjólkurvörur sem innihalda ekki sykur

„Jógúrt og skyr, alltaf gott að hafa með sér mjólkurvörur, ef að fólk hefur áhuga á því.

Drykkjarjógúrt og skyr sem innihalda ekki of mikinn sykur eru hollt og gott nesti. Sniðugt er að gera sér hollar samlokur með miklu grænmeti og til dæmis kalkúnaáleggi og góðri sósu eða kotasælu."

Drykkir - vatnið er málið

„Sódavatn eða sykurlausir drykkir til að blanda við áfengi ef fólk kýs að drekka það eða tónik. En það sem er best er vatnið. Vatn, vatn, vatn."

„Mitt persónulega ráð til að forðast þynnku er að fá sér mjólkurvöru fyrir svefninn eins og kókómjólk, mjólk eða jógúrt og banana. Það vikar og ef þið komið niður lýsispillum er það ekki verra. Þá ætti fólk að vakna hresst daginn eftir."