Ögmundur sáttur við nýjar fangareglur

Innanríkisráðherra líst vel á hertar reglur í fangelsum vegna fanga sem tilheyra skipulögðum glæpasamtökum. Hann segir þær alls ekki mismuna föngum.

Páll Vinkel, fangelsismálastjóri, greindi fyrst frá nýjum verklagsreglum í fréttum Stöðvar 2 í gær. Ögmundur Jónasson átti viðræður við fangelsismálayfirvöld vegna reglnanna í morgun.

„Mér líst mjög vel á þær. Þær ganga út á það að einstaklingar sem heyra til hópum sem sannast hefur að stunda skipulagða glæpastarfsemi verði ekki látnir afplána í opnum fangelsum og að ef þeir fái reynslulausn þá verði það samkvæmt tilteknum skilyrðum. Þetta finnst mér fullkomlega eðlilegar reglur af hálfu fangelsismálastjórnar," segir Ögmundur.

En er ekki verið að mismuna föngum með þessum hættum?

„Ég hef nú sagt að fangar hafa mismunað gróflega gegn sínu samfélagi. Það er ekki hægt að alhæfa um alla sem sitja í fangelsum. En sumir hafa framið glæpi sem eru þess eðlis að það er eðlilegt að meðhöndla þá með öðrum hætti en aðra, og þá er ég að tala um þá sem hafa beitt annað fólk ofbeldi," segir Ögmundur.