Allir eldri en 60 ára láti bólusetja sig

Sóttvarnarlæknir mælist til þess að allir einstaklingar 60 ára og eldri láti bólusetja sig gegn inflúensu. Þetta kemur fram í skrifum hans á vefsíðu Landlæknis.

Að auki segir hann að öll börn og fullorðnir sem þjást af langvinnum hjarta-, lungna-, nýrna- og lifrarsjúkdómum, sykursýki, illkynja sjúkdómum og öðrum ónæmisbælandi sjúkdómum ættu að láta bólusetja sig, sem og heilbrigðisstarfsmenn sem annast sjúklinga í áhættuhópum sem taldir eru upp hér að ofan. Þá eiga þungaðar konur líka að láta bólusetja sig.

Sóttvarnarlæknir segir að besta verndin gegn inflúensu sé bólusetning en verndin er mismunandi á milli ára og getur verið allt að 60-70%. Jafnvel þótt bólusetning verndi ekki fullkomlega getur hún í mörgum tilfellum komið í veg fyrir alvarlega sýkingu. Rétt er einnig að minna á að til eru lyf sem hægt er að nota ef þau eru tekin innan við tveggja sólarhringa frá upphafi einkenna.