Bíógestir í gamaldags sundferð

Á morgun fer hið svonefnda sundbíó fram á kvikmyndahátíðinni RIFF þegar kvikmyndin Back to the Future verður sýnd í Laugardalslaug.

Í myndinni ferðast söguhetjan, Marty McFly, aftur í tíma til 6. áratugarins. Þar glímir hann við áskoranir þeirra tíma en myndin nær ákveðnum hápunkti þegar hann lendir inni á dansleik og kynnir alla viðstadda fyrir rokki og róli. Þessa eftirminnilegu senu má sjá á hlekknum hér að ofan.

Skipuleggjendur RIFF stefna að því að ná fram svipuðu andrúmslofti í Laugardalslauginni þetta kvöld og endurvekja þannig tíðaranda sjötta áratugarins. Laugin hefur verið skreytt rækilega, djassband af gamla skólanum hitar upp og lindyhop dansarar taka nokkur spor áður en myndin hefst.

Bíógestir geta því bókstaflega svamlað um í tíðaranda sjötta áratugarins meðan Marty McFly kynnir fólk í fortíðinni fyrir hjólabrettum og rokktónlist.

Sundbíóið er fastur liður á kvikmyndahátíðinni RIFF og hefur verið mjög vinsælt, bæði meðal ungs fólks, fjölskyldufólks og erlenda gesta. „Í fyrra komust ekki allir að sem vildu," segir Jóhann Alfreið Kristinsson, umsjónarmaður sérviðburða RIFF. Sundbíóið fór fram í Sundhöllinni í fyrra en verður í þetta sinn í innilaug Laugardalslaugarinnar sem tekur allt að 400 gesti.

Sýningin hefst klukkan átta í Laugardalslauginni. Miðinn kostar 1200 kr. og verður bæði seldur á vefsíðu hátíðarinnar og við innganginn.