Zlatan: PSG getur unnið Meistaradeildina

Sjálfstraustið er í botni hjá Svíanum Zlatan Ibrahimovic eins og venjulega. Hann segir að það sé aðeins tímaspursmál hvenær hans nýja félag, PSG, verði orðið eitt besta liðið í Meistaradeildinni.

Zlatan hefur verið fljótur að slá í gegn í franska boltanum og er búinn að skora fjögur mörk í fyrstu þremur leikjum sínum í frönsku deildinni.

"Það er mjög spennandi að vera hérna. Allt er nýtt og framandi. Félagið er alltaf að stækka og vill vinna alla stóru bikarana," sagði Zlatan.

"Ég hef trú á því að draumar eigendanna geti ræst og ég vil taka þátt í því að láta drauma þeirra rætast. Liðið er að safna að sér alvöru mönnum til þess að verða alvöru lið. Hver vill ekki taka þátt í svona uppbyggingu?

"Ég hefði ekki komið hingað ef ég hefði ekki trú á því að PSG gæti unnið Meistaradeildina. Ég hef vissulega aldrei unnið þá keppni en er samt ekkert að fara á taugum yfir því.

"Það mun eðlilega taka smá tíma að byggja upp besta lið Evrópu en við eigum alla möguleika á því að láta það ganga upp. Það er allt til staðar hérna. Frábærir leikmenn og frábær þjálfari."