Grétar Rafn: Fagleg umgjörð hjá landsliðinu í fyrsta sinn í mörg ár

Grétar Rafn Steinsson segir að hann hafi notið þess að æfa knattspyrnu í fyrsta sinn í tvö ár þegar landsliðið kom saman fyrir leik gegn Svartfjallalandi í vor.

Það hefur gengið hjá ýmsu hjá Grétari Rafni sem fór frá Bolton í sumar eftir að samningur hans við félagið rann út. Félagið féll úr ensku úrvalsdeildinni í vor en þar að auki hafði Grétar Rafn hafði fyrr á tímabilinu tekið sér frí frá landsliðinu til að sinna persónulegum málum.

En nú eru breyttir tímar. Grétar Rafn samdi við tyrkneska félagið Kayserispor og spilaði í varnarlínu liðsins um helgina. Þar að auki eru nýir tímar í landsliðinu undir stjórn Svíans Lars Lagerbäck sem stýrir Íslandi í sínum fyrsta mótsleik þegar liðið mætir Noregi á Laugardalsvelli á föstudagskvöldið.

Grétar Rafn svaraði spurningum fjölmiðla á Laugardalsvelli í hádeginu í dag fyrir æfingu íslenska landsliðsins. Hann segist ánægður nú, bæði hjá félagsliði sínu sem og landsliði.

Þreyta og leiði í Bolton

„Það kemur oft upp þreyta og leiði í mann, sérstaklega þegar það er leiðinlegt á vinnustaðnum og manni lendir upp á kant við aðra," sagði Grétar Rafn.

„Ég var ekki sáttur við hvernig staðið var að hlutunum hjá Bolton síðustu tvö árin mín þar. Ég var ósammála því hvernig klúbburinn var rekinn og hvað var gert. Það gerðist svo það sem ég óttaðist [þegar liðið féll] og ekki hefur liðið byrjað tímabilið vel [í ensku B-deildinni]. Klúbburinn er því í enn verri stöðu en áður."

„Þegar ég kom á landsliðsæfingu í Svartfjallalandi í vetur naut ég þess virkilega að æfa fótbolta. Það var í fyrsta sinn í tvö ár sem það gerðist. Æfingarnar með landsliðinu í sumar voru svo mjög skemmtilegar sem og æfingarnar í Tyrklandi eftir að ég kom þangað."

„Ég vil vera í umhverfi þar sem skipulag og fagmennska er ráðandi. Ég á ekki heima í umhverfi þar sem ríkir svakaleg áhugamennska. Þá á ég það til að pirra mig og gera þetta erfiðara fyrir mig. Ég kann vel við mig í faglegu umhverfi og landsliðið er með mjög faglegt umhverfi núna í fyrsta sinn í mörg ár."

„Ég er virkilega ánægður með þær breytingar sem hafa verið gerðar. Það er leitt að vera orðinn þrítugur þegar það gerist en engu að síður frábært að fá að taka þátt í því."

Stuðningsmenn neituðu að fara

Hann segir það mikla upplifun að vera kominn í tyrkneska boltann. „Þetta er öðruvísi. Það er mikill hiti, bæði á mælinum og í fólkinu. Fyrsta vikan verður einhvern tímann góður kafli í góðri bók. Um helgina misstum við leik niður í jafntefli sem við hefðum átt að vinna 10-1. Áhorfendur neituðu að yfirgefa völlinn eftir leik og rútan okkar var svo stoppuð á leiðinni upp á hótel."

Grétar vill spila sem hafsent á síðustu árum ferils síns og fær tækifæri til þess hjá Kayserispor. „Það vó þungt í minni ákvörðun en auk þess er það dýrmætt að fá tækifæri að spila knattspyrnu í þessum gæðaflokki í Tyrklandi. Það verður mikil lífsreynsla og verður gaman að geta litið til baka til þessa tíma."

„Það er mikið af sterkum einstaklingum í liðinu og er þá helst vandamálið að það vantar liðsheild og skynsamar ákvarðanir. Það er verið að byggja upp nýtt lið og er stefnan að það verði eitt af stóru liðunum í Tyrklandi eftir 5-10 ár. Það er gaman að fá hlutverk í þeirri uppbyggingu."