Tafir byrjaðar að myndast við Selfoss

Umferðin við Selfoss er farin að þyngjast og umferðartafir við Ölfusárbrú farnar að myndast. Landsmenn hugsa sér margir til hreyfings nú um helgina og fara þá fjölmargir um Selfoss á leið sinni í aðra hvora áttina.

Lögreglumaður á vakt á Selfossi segir að enn séu tafirnar ekki miklar við brúna. Þær gætu þó aukist þegar líður á.

Sem stendur er þyrla Landhelgisgæslunnar á sveimi yfir svæðinu við umferðareftirlit. Hún hefur eftirlit með framgangi mála úr lofti og flýgur m.a. yfir tjaldstæði í skoðunarferðum sínum.

Í Borgarnesi er umferðin sömuleiðis farin að þyngjast, en þeir sem stefna úr borginni og norður á land fara þar um. Þar hefur allt gengið óskum samkvæmt hingað til og hvergi um neinar tafir að ræða. Lögreglumaður á vakt telur að umferðin eigi enn eftir að aukast nokkuð og haldast þung fram á kvöld.