Umfjöllun, viðtöl og einkunnir: Fram - Selfoss 0-2

Nýliðar Selfoss gerðu góða ferð yfir Hellisheiðina og niður í í Laugardal í kvöld. Þeir unnu þar góðan sigur gegn arfaslökum Frömurum í leik sem einkenndist af baráttu frekar en fagurri knattspyrnu.

Fyrri hálfleikurinn var afskaplega tíðindalítill. Eina færi hans fékk Viðar Örn Kjartansson en hann skaut framhjá í sannkölluðu dauðafæri á markteig.

Síðari hálfleikurinn hófst með látum og strax á 50. mínútu fengu Selfyssingar vítaspyrnu eftir að Ögmundur Kristinsson braut á Viðari Erni sem var sloppinn einn í gegn. Ögmundur heppinn að sleppa aðeins með tiltal frá annars góðum dómara leiksins Kristni Jakobssyni

Viðar fór sjálfur á punktinn og skoraði af fádæma öryggi með því að senda Ögmund í rangt horn.

Eftir þetta færðist smá líf í leik heimamanna án þess þó að skapa sér afgerandi marktækifæri. Eina alvöru færi þeirra fékk Samuel Hewson er hann skaut að marki en á línunni stóð Steven Lennon og fékk boltann í sig og bjargaði marki fyrir gestina.

Það var svo á 88. mínútu að gestirnir gerðu út um leikinn. Varamaðurinn Joe Tillen spólaði sig í gegnum vörn Frammara og skaut að marki en Ögmundur varði án þess að halda boltanum og Tillen tók frákastið og skoraði af öryggi.

Sanngjarn sigur Selfyssinga í höfn og þeir komnir upp í sjötta sæti deildarinnar en Frammarar komnir niður í það tíunda.

Viðar Örn: Vorum betra liðið

Besti maður vallarins í Laugardalnum í kvöld var sáttur í leiklok.

„Ég meiddist illa á hné og var frá í 2 mánuði og er búinn að vera að koma inn á í þessum leikjum og það er gaman að fá að byrja leikinn. Koma hingað og sækja 3 dýrmæt stig,“ sagði Viðar kampakátur.

"Mér fannst við betra liðið á vellinum og börðumst eins og ljón en það verðum við að gera í hverjum einasta leik ef við ætlum að fá eitthvað út úr honum,“ sagði Viðar að lokum.

Ögmundur: Verðum að rífa okkur upp

Markvörður Frammara Ögmundur Kristinsson var brúnarþungur í leikslok.

„Þetta voru mikil vonbrigði. Við sköpuðum okkur engin færi og þess vegna fáum við ekkert úr þessum leik. Við verðum að rífa okkur upp af rassgatinu og sækja 3 stig í næsta leik á móti Breiðablik.“

Aðspurður hvort hann hafi verið heppinn að fá ekki rautt spjald í vítinu.

„Þetta var aldrei rautt spjald og mér fannst Kiddi gera þetta vel.“