Regína Ósk: Ég spái því að þau vinni sinn riðil

Regína Ósk og Friðrik Ómar vöktu mikla athygli eftir þátttöku sína í Söngvakeppni Evrópskra Sjónvarspsstöðva árið 2008 með laginu This is my life.

Lífið spurði Regínu hvað íslensku keppendurnir, Greta Salóme og Jónsi, sem fluttu lagið Never Forget í Kristalshöllinni í Bakú fyrir tæpri stundu, ættu að leggja áherslu á í kvöld í undankeppninni eins og Eurobandið fór í gegnum á sínum tíma.

„Það er gaman að segja frá því að það eru akkkúrat fjögur ár síðan ég og Friðrik stóðum á sviðinu og ég fæ alltaf fiðring á þessum tíma. Ég hef engar áhyggjur af þeim. Greta er búin að vinna vinnuna sína og það er ekkert sem getur klikkað. Þau þurfa bara að halda áfram að gera það sem þau hafa verið að gera og ég spái því að þau vinni sinn riðil. Ég spái þeim í topp fimm í aðalkeppninni. Ég spái að Svíþjóð vinni og svo við, Serbía, Spánn og Kýpur," segir Regína Ósk.

„Þau þurfa bara að njóta þess að vera þarna af því að þau eru búin að vinna heimavinnuna sína. Ég hef mikla trú á þessu atriði," segir hún létt í bragði.