Tók upp samtal sitt við bæjarlögmann

Sigrún Ágústa Bragadóttir, fyrrverandi framkvæmdastjóri Lífeyrissjóðs Kópavogsbæjar, tók upp samtal sitt við Þórð Clausen bæjarlögmann þar sem hann mun hafa lagt að henni að breyta framburði sínum í sakamáli sem höfðað hefur verið á hendur stjórn sjóðsins. Áður hefur komið fram að markmiðið með samtalinu hafi verið að fá sakborninga til að halda því fram fyrir dómi að Gunnar Ingi Birgisson, fyrrverandi bæjarstjóri og stjórnarmaður í lífeyrissjóðnum, hafi beitt hræðsluáróðri til að hafa sitt fram við stjórnun sjóðsins.

Í yfirlýsingu sem Vilhjálmur H. Vilhjálmsson hæstaréttarlögmaður sendi fyrir hönd Sigrúnar Ágústu kemur fram að föstudaginn 6. janúar síðastliðinn hafi verið hringt var úr símanúmeri Kópvogsbæjar. „Sigrúnu fannst símtalið óviðeigandi og skrifaði því símtalið upp. Í símtalinu sagði bæjarlögmaðurinn að hann hefði verið í sambandi við tvo meðákærðu í máli Héraðsdóms Reykjaness nr. S-11/2012 og þau væru sammála að vörn ákærðu í málinu væri sú að halda því statt og stöðugt fram að meðákærði Gunnar Birgisson hafi verið hugmyndasmiðurinn að baki lánveitingum Lífeyrissjóðs Kópavogs til Kópavogsbæjar og hann hafi beitt ákærðu hótunum til þess að fá þau til þess að lúta hans vilja. Gunnar væri því höfuðpaurinn í málinu," segir í yfirlýsingunni.

Þann 11. janúar síðastliðinn hafi Sigrún hringt í bæjarlögmanninn, til þess að fá nánari útskýringar á því hvað hann hefði verið að fara í fyrra símtalinu. „Símtalið var tekið upp og staðfestir upptakan að bæjarlögmaðurinn var að beita sér fyrir því að fá ákærðu til þess samræma framburði sína og varpa sök á Gunnar Inga Birgisson í sakamálinu," segir í yfirlýsingunni.

Samkvæmt frásögn Sigrúnar Ágústu sagði bæjarlögmaðurinn meðal annars í símtalinu: „Ég er búinn að ræða við þau bæði Sigrúnu (Guðmundsdóttur innskot) og Jón Júl og þið verðið öll að láta það koma skýrt fram að sko að sá sem stjórnar ferðinni í þessu öllu frá a-ö er Gunnar Ingi Birgisson."

Þessar skýringar Sigrúnar Ágústu eru þvert á skýringar Þórðar Clausen bæjarlögmanns sem sagði í gær að ráðleggingar sínar til hennar hafi fyrst og fremst verið þær að segja satt og rétt frá, og skýra frá þeim samskiptum sem hún hafði átt við stjórnarformann lífeyrissjóðsins og aðdraganda yfirlýsingar þeirrar sem send var til FME. Þá segir Þórður að samskipti sín við Sigrúnu Ágústu hafi verið að hennar frumkvæði.