Tveir erlendir varnarmenn hætta í Pepsi-deildinni

Færeyingurinn Jónas Þór Næs og Daninn Nikolaj Hagelskjær Pedersen stóðu sig báðir vel með liðum sínum í Pepsi-deildinni síðasta sumar en vefsíðan fótbolti.net segir frá því í dag að þeir verði ekki áfram á Íslandi í sumar.

Jónas Þór Næs, sem lék með Val í fyrrasumar, hefur samið við danska C-deildarliðið Fremad Amager en kona hans hefur verið við nám í Danmörku. Jónas Þór spilar sem bakvörður.

Nikolaj Hagelskjær Pedersen, sem lék með Stjörnunni 2011, hefur samið við danska félagið FC Frederica. Nikolaj spilar bæði sem miðvörður og afturliggjandi miðjumaður.