Chelsea í fjórða sætið | WBA valtaði yfir Sunderland

Didier Drogba og Frank Lampard fóru fyrir liði Chelsea sem lagði Bolton 3-0. West Brom burstaði Sunderland 4-0 og Úlfarnir náðu í óvænt stig með 2-2 jafntefli á útivelli gegn Newcastle.

Chelsea 3-0 Bolton

Didier Drogba var í byrjunarliði Chelsea á kostnað Fernando Torres á Stamford Bridge. Dagurinn virtist ætla að verða langur fyrir heimamenn sem tókst ekki að finna leiðina í mark Bolton í fyrri hálfleiknum.

Brasilíumaðurinn David Luiz kom heimamönnum yfir snemma í seinni hálfleik þegar hann afgreiddi boltann glæsilega í netið. Nokkrum mínútum síðar var Didier Drogba réttur maður á réttum stað eftir hornspyrnu Frank Lampard.

Fernando Torres kom inn á fyrir meiddan Drogba þegar stundarfjórðungur lifði leiks. Þremur mínútum síðar var Frank Lampard á réttum stað eftir fyrirgjöf Juan Mata og skoraði af stuttu færi. Lampard hefur nú skorað 150 deildarmörk á Englandi.

Með sigrinum kemst Chelsea upp fyrir Arsenal í fjórða sæti deildarinnar. Grétar Rafn Steinsson lék allan leikinn með Bolton.

Newcastle 2-2 Wolves

Wolves náði í mikilvægt stig á St. James' Park í fyrsta leik sínum undir stjórn Terry Connor.

Það blés ekki byrlega fyrir lærisveina Connor í dag. Papiss Demba Cisse kom heimamönnum yfir snemma leiks eftir klaufagang hjá varnarmönnum Wolves. Argentínumaðurinn Jonas Gutiérrez bætti við marki í fyrri hálfleik með glæsilegu langskoti.

Hálfleiksræða Connor virtist hafa skilað sér til leikmanna Wolves sem minnkuðu muninn strax á 50. mínútu. Matt Jarvis skaut af löngu færi og boltinn fór af varnarmanni yfir Tim Krul í marki Newcastle.

Áfram hélt sókn Úlfanna og Írinn Kevin Doyle jafnaði metin af stuttu færi um miðjan hálfleikinn. Frábær endurkoma hjá gestunum sem komust upp úr fallsæti í bili og sitja í 16. sæti.

QPR 0-1 Fulham

QPR tók á móti Fulham á Loftus Road í Lundúnum og lenti strax marki undir. Rússinn Pavel Pograbnyak virðist ætla að reynast Fulham vel en kappinn kom gestunum yfir á 7. mínútu.

QPR varð fyrir áfalli eftir rúman hálftíma leik þegar Samba Diakité fékk að líta sitt annað gula spjald og þar með rautt. Manni færri tókst lærisveinum Mark Hughes ekki að rétta úr kútnum.

Heiðar Helguson var ekki í leikmannahópi QPR í dag.

WBA 4-0 Sunderland

Peter Odemwingie skoraði tvö mörk fyrir West Brom sem tók Sunderland í kennslustund á Hawthorns-vellinum. Odemwingie kom heimamönnum á bragðið af stuttu færi eftir aðeins þrjár mínútur og James Morrison jók muninn í 2-0 skömmu fyrir hlé.

Tveimur mörkum undir brá Martin O'Neill, stjóri Sunderland, á það ráð að skipta tveimur framherjum, þeim Frazier Campbell og Nicklas Bendtner, inn á í hálfleik. Það bar ekki tilætlaðan árangur því Odemwingie skoraði annað mark sitt í upphafi síðari hálfleiks eftir hraða sókn heimamanna.

Keith Andrews batt svo endahnútinn á niðurlægingu Sunderland þegar hann skoraði fjórða mark West Brom.

Wigan 0-0 Aston Villa

Wigan komst úr botnsæti deildarinnar eftir markalaust jafntefli í bragðdaufum leik á DW-vellinum. Wigan menn sóttu af krafti undir lok leiksins án árangurs. Darren Bent fór meiddur af velli hjá Villa seint í leiknum.

Leikur Manchester City og Blackburn hefst klukkan 17:30. Hann er í beinni útsendingu á Sport 2.



Staðan í ensku úrvalsdeildinni.