Nadal sló út Federer í undanúrslitum

Rafael Nadal er kominn í úrslitin á Opna ástralska meistaramótinu í tennis eftir sigur á Roger Federer í hreint magnaðri undanúrslitaviðureign.

Þessir tveir hafa margoft mæst á vellinum en Nadal hefur haft betur í viðureignum þeirra á stórmótum síðustu ár. Federer vann síðast Nadal á stórmóti árið 2007 og þarf að bíða eitthvað lengur eftir næsta sigrinum.

Nadal tapaði fyrsta settinu, 7-6, en vann þau þrjú næstu, 6-2, 7-6 og 6-4, og þar með viðureignina. Hann hefur því unnið átta af tíu síðustu viðureignum þeirra á stórmótum.

Sá svissneski, sem margir telja einn allra besta tenniskappa heims, var nú í undanúrslitum opna ástralska meistaramótsins í níunda árið í röð og ætlaði sér svo sannarlega að hafa við Nadal í þetta skiptið.

Nadal glímdi við meiðsli á síðasta ári en hefur allur verið að koma til síðustu vikurnar. Í dag sýndi hann að hann er upp á sitt allra besta á nýjan leik.

Federer byrjaði betur og komst í 3-0 í fyrsta settinu. En Nadal jafnaði og þurfti upphækkun til að útkljá það. Þá hafði Federer betur, 7-5.

Nadal svaraði heldur betur fyrir sig með því að taka annað sett næsta auðveldlega og jafna þar með metin.

Allt var í járnum í þriðja setti en í þetta skiptið reyndist Nadal sterkari á lokasprettinum og vann eftir upphækkun, 7-5.

Federer reyndi hvað hann gat til að halda í við andstæðing sinn í fjórða setti. Í stöðunni 4-4, þegar Federer átti uppgjöf, náði hins vegar Nadal forystu og var því í kjörstöðu. Hann átti uppgjöf og staðan var 5-4, honum í vil.

Federer barðist eins og hann gat í lokalotunni og fékk tækifæri til að jafna leikinn en allt kom fyrir ekki. Nadal sýndi ótrúlega takta og tryggði sér frábæran sigur.

Nadal mætir í úrslitunum annað hvort Novak Djokovic eða Andy Murray sem eigast við í undanúrslitum á morgun. Nadal fær þá tækifæri til að vinna sinn ellefta stórmótstitil frá upphafi.