Sheryl Crow með heilaæxli

Tónlistarkonan Sheryl Crow greindist með heilaæxli í nóvember í fyrra en þessu greindi Crow frá í viðtali við blaðið Las Vegas Review á dögunum. Crow segir æxlið vera góðkynja en hún þurfi að fara reglulega til læknis sem fylgist með þróuninni.

„Ég fór fyrst til læknis því mér fannst ég vera orðin svo gleymin. Það er engin ástæða til að vera með áhyggjur, þetta er bara smá hraðahindrun á lífsleiðinni," segir Crow en hún var meðal annars farin að gleyma söngtextunum á tónleikum.

Leikkonurnar Elizabeth Taylor og Mary Tyler Moore voru með svipaða tegund af æxli í heila. Crow greindist með brjóstakrabbamein árið 2006 sem var uppgötvað snemma og hún sigraðist á.

Á Facebook-síðu Sheryl Crow þakkar hún aðdáendum sínum fyrir fallegar kveðjur og segir þeim ekki að hafa áhyggjur, henni líði vel.