Segir dreifbýlisbyggðir látnar blæða vegna Álftaness

Ríkisstjórnin er sökuð um að láta þau sveitarfélög í dreifbýlinu sem verst standa ein um að axla byrðar af fjárhagshruni Álftaness með því að taka af þeim 300 milljóna króna framlag og færa til Álftaness.

Einar K. Guðfinnsson, þingmaður Sjálfstæðisflokksins, sagði í sérstakri umræðu á Alþingi í gær að fjármálaráðherra og innanríkisráðherra hefðu einhliða ákveðið að taka 40 prósent af svokölluðu aukaframlagi Jöfnunarsjóðs sveitarfélaga, eða 300 millónir króna af 700 milljónum, til að bæta fjárhagsvanda Álftaness. Þetta þýddi að önnur sveitarfélög, sem notið hefðu aukaframlagsins, yrðu að þola allt að 60 prósent skerðingu milli ára, sem Einar sagði kjaftshögg fyrir fátækustu og skuldugustu dreifbýlisbyggðirnar.

,,Nú hefur hæstvirtur ráðherra leitað og fundið breiðu bökin. Þau eru í Skaftárhreppi, þau eru í Vesturbyggð, þau eru í Húnavatnshreppi, þau eru í Skútustaðahreppi. Þetta eru sveitarfélögin meðal annarra sem eiga að taka á sig skerðingu vegna aukaframlagsins upp á 40%," sagði Einar K. Guðfinnsson.

Ráðherra sveitarstjórnarmála, Ögmundur Jónasson, sagðist hafa sannfærst um eitt í umræðunni; ,,..að brýnt er að gera Ísland að einu kjördæmi og að við horfum öll heildstætt á málin en ekki út frá sjónarhóli einstakra kjördæma."

Eitt sveitarfélag í landinu, Álftanes, væri einfaldlega komið í þá stöðu að búið væri að taka af því fjárráðin og setja undir fjárhaldsstjórn, sem hefði óskað eftir öllu aukaframlaginu.

,,Þessi umræða þarf að dýpka, þykir mér. Ég auglýsi eftir lausnum í stað upphrópana," sagði Ögmundur.