Mér leiðist ekkert mikið að hlaupa upp kantinn

Vaskleg framganga hins 21 árs gamla Dofra Snorrasonar í undanförnum leikjum KR hefur vakið verðskuldaða athygli. Hann hefur verið hreint magnaður í bakverðinum hjá KR og skoraði svo sigurmarkið gegn Fylki um síðustu helgi sem tryggði KR titilinn.

„Ég er mjög ánægður með þessa leiki hjá mér. Það er loksins kominn meiri stöðugleiki í mínum leik. Ég er kominn með það betur á hreint hvað ég á að gera og sjálfstraustið er meira," sagði Dofri sem lagði einnig upp hið afar mikilvæga jöfnunarmark fyrir KR í Eyjum. Þá átti hann eina af sínum mörgu rispum upp kantinn og gaf magnaða sendingu í teiginn sem Kjartan Henry skilaði í mark.

„Mér leiðist ekkert mikið að hlaupa upp kantinn. Það getur samt komið í bakið á manni. Ég þarf stundum að hemja mig. Rúnar þjálfari vill að ég geri þetta í hófi enda vill Mummi hinum megin einnig líka hlaupa upp. Það þarf því að velja réttu augnablikin."

Dofri var miðjumaður upp yngri flokkana en í 2. flokki var honum hent í bakvörðinn og þar líður honum ágætlega en hann getur einnig leikið út á kanti. Dofri lék 13 leiki með Víkingi í 1. deildinni í fyrra en hann var þar á láni. Hann kom svo til baka og kom við sögu í 9 leikjum hjá KR í fyrra.

„Ég kann vel við mig í bakverðinum og sérstaklega ef ég er í liði sem sækir og heldur boltanum mikið. Ég hef ekkert verið að stúdera neina bakverði enn þá. Var meira að skoða miðjumenn áður en ég þarf að bæta úr því og skoða fleiri bakverði eins og Dani Alves," sagði Dofri en hann segir dvölina hjá Víkinga hafa styrkt sig. Þó svo að hann sé sífellt að verða reynslumeiri losnar hann seint við fiðringinn fyrir leiki.

„Ég verð alltaf smá stressaður fyrir alla leiki. Það fylgir þessu. Ég er samt aðeins meira stressaður fyrir leiki hjá KR en ég var hjá Víkingi."

Lið umferðarinnar:

Ögmundur Kristinsson - Fram

Dofri Snorrason - KR

Tommy Nielsen - FH

Tryggvi Sveinn Bjarnason - Stjarnan

Hlynur Atli Magnússon - Fram

Egill Jónsson - KR

Aron Elís Þrándarson - Víkingur

Jóhann Laxdal - Stjarnan

Kristinn Steindórsson - Breiðablik

Atli Guðnason - FH

Garðar Jóhannsson - Stjarnan