Helmingi minna rusl

Óflokkað heimilissorp á Akureyri hefur minnkað um helming frá síðasta hausti. Í ágúst 2010 setti Akureyrarbær af stað svokallaða B-leið í endurvinnslu á Eyjafjarðarsvæðinu og var flokkunartunnum komið á hvert heimili, sem eru um 7.230 talsins.

Þrettán endurvinnslustöðvar víðs vegar um Akureyrarbæ voru endurbættar og nam kostnaður við hverja þeirra um 500 þúsund krónum, samkvæmt Helga Má Pálssyni, bæjartæknifræðingi og yfirmanni framkvæmdardeildar.

„Aðgerðirnar tóku lengri tíma en við áætluðum og kynningin hefði mátt vera betri,“ segir Helgi Már, en bætir við að árangurinn hafi þó ekki látið á sér standa eftir að verkefnið fór af stað. Eini kostnaðurinn fyrir bæinn hafi verið að reisa veggi í kringum endurvinnslustöðvarnar.

„En það er fljótt að borga sig þar sem mikil meðvitund er hjá íbúum um endurvinnslu. Það er óvíða sem fólk er svona meðvitað um þessa hluti og jákvætt yfir höfuð.“

Innan við 50 prósent af óflokkuðu sorpi fer til urðunar miðað við það sem áður var. Sorpið, sem áður var keyrt á Glerárdal, er nú flutt til Stekkjavíkur hjá Blönduósi.

Helgi Pálsson, rekstrarstjóri Gámaþjónustu Norðurlands, tekur undir með Helga Má og segir fyrirtækið ekki hafa búist við því að útkoman yrði svona góð.

„Urðun óflokkaðs úrgangs hefur minnkað um helming síðan í haust og það er ánægjuleg niðurstaða,“ segir Helgi. „Við bjuggumst ekki við því að þetta yrði svo gott.“

Helgi segir að á Akureyrarsvæðinu sé rík hefð fyrir flokkun og endurvinnslu. Akureyri hafi verið fyrst sveitarfélaga á landinu til að taka upp blaðaflokkunargáma og út frá þeirri þróun hafi þessi leið verið vel fær.

sunna@frettabladid.is