Peningaöflin senda jaðarbyggð skilaboð

Stjórn Atvinnuþróunarsjóðs Austurlands fordæmir þá ákvörðun Framtakssjóðs Íslands að leggja ekki fé í álkaplaverksmiðju á Seyðisfirði. „Ljóst er af öllu að megin ástæða afstöðu sjóðsins ræðst af staðsetningu verksmiðjunnar, en ekki fjárhagslegum forsendum. Stjórn Atvinnuþróunarsjóðsins lýsir jafnframt yfir vandlætingu sinni á því hvernig þeir sem fara með fé almennings í lífeyrissjóðum landsins leyfa sér að koma fram við jaðarbyggðir á Íslandi," segir stjórnin í ályktun sem samþykkt var að tillögu Ólafs Hr. Sigurðssonar, bæjarstjóra á Seyðisfirði.

Þá skoraði stjórn Atvinnuþróunarsjóðsins á ríkisstjórnina og Samband íslenskra sveitarfélaga að fjalla strax um stöðu jaðarbyggða á Íslandi „áður en það verður um seinan".

Ólafur segir í pistli á heimasíðu Seyðisfjarðar að bæjarstjórnin hafi beðið eitt ár með alla hagræðingu í mannahaldi í þeirri von að birti til í atvinnulífinu. Sú von hafi nú brugðist. Ömurleg staðreynd blasi við jaðarbyggðum á Íslandi.

„Peningaöfl landsins stýra því algerlega hvert fjármagnið fer og einu virðist gilda þó að fjármálaráðherra landsins leggist á árar með okkur og reyni að koma vitinu fyrir menn. Verst finnst manni samt að sjá að sjóður sem er í eigu sextán lífeyrissjóða, Landsbankans og VÍS skuli haga sér svona. Sjóður sem skilaði fjögurra milljarða hagnaði síðustu sextán mánuðina. Þetta eru flott skilaboð til þeirra sem búa á þessum svæðum landsins. Við erum líka að borga okkar í lífeyrissjóðina. Er ekki ráð að við snúum bökum saman á landsbyggðinni og látum skella í tönnum. Fjandinn hafi það, við verðum ekki drepin hljóðalaust," segir bæjarstjórinn á Seyðisfirði.

„Þetta verkefni, eins og það var lagt upp, samræmist ekki markmiðum Framtakssjóðsins um ávöxtun og áhættu. Okkur er falið að ávaxta almannafé og ber að fara mjög vandlega yfir allar fjárfestingar og í þessu tilfelli var niðurstaðan að fjárfesta ekki," segir Pétur Þ. Óskarsson, talsmaður Framtakssjóðsins.

Pétur kveðst skilja vonbrigði heimamanna með að fá ekki fjárfesta að verksmiðjunni. „Ekki nema ein af hverjum sex til átta fjárfestingum sem Framtakssjóðurinn skoðar endar með ákvörðun um fjárfestingu."

gar@frettabladid.is