Icesave hvergi nærri lokið

Ekki má útiloka að Icesave-málið endi fyrir EFTA-dómstólnum og að Bretar og Hollendingar láti á reyna að sækja vaxtagreiðslur í vasa stjórnvalda hér vegna fjármuna sem notaðir voru til að greiða út lágmarkstryggingu til innstæðueigenda.

„Ég sé engin sérstök merki þess að ESA muni láta málið falla niður,“ segir Lárus Blöndal hæstaréttarlögmaður sem sæti átti í samninganefnd Íslands í viðræðum við Breta og Hollendinga. Samninganefndin með Lee Buchheit í fararbroddi sagði undir lok síðasta árs þann samning sem þá lá fyrir þann síðasta, samningaleiðin væri fullreynd. Áhætta fælist í að fara dómstólaleiðina.

Samkvæmt nýju verðmati skilanefndar og slitastjórnar Landsbankans sem kynnt var á fimmtudag stefnir í að þrotabúið geti staðið undir 94 til 99 prósentum af höfuðstól Icesave-krafna. Þetta er betra mat en áður hefur legið fyrir. Þegar þrotabúið hefur greitt upp forgangskröfur, það er Icesave-kröfur og heildsöluinnlán, fellur það sem út af stendur til almennra kröfuhafa.

Í kjölfar nýs verðmats uppfærði fjármálaráðuneytið mat sitt á kostnaði ríkissjóðs vegna þeirra samninga sem voru felldir. Hann hefði orðið ellefu milljarðar króna. Ráðuneytið tekur fram að Icesave-málið geti enn farið fyrir dómstóla. Kostnaðurinn af þeim sökum og af annarri óvissu sé óljós. Ríkið hefur ekki undirgengist skuldbindingar um vaxtagreiðslur af Icesave-lánunum.

„Ég hef enga ástæðu til að ætla að Bretar og Hollendingar muni samþykkja að láta málið kyrrt liggja. Ég tel það óraunhæft. Þeir munu láta á það reyna að fá kostnað af fjármögnuninni greiddan. Kostnaðurinn vegna eldri Icesave samninga sem voru með 5,55 prósenta vöxtum hefði verið eitt hundrað og sjötíu milljarðar króna ónúvirt, samkvæmt sömu reikniforsendum og nýju mati skilanefndar. Af þessu sést að vaxtakostnaðurinn getur orðið gríðarhár og hefur því verulega þýðingu í þessu máli,“ segir Lárus og bendir á að við bætist spurningin hvort stjórnvöld hafi mismunað innstæðueigendum. Við það gæti kostnaður vegna vaxta hækkað verulega. Það væri því mikil einföldun að segja að þetta mál sé komið á endastöð með þessum nýju upplýsingum frá skilanefnd sem vissulega eru jákvæðar.

jonab@frettabladid.is