Hlaut einn þyngsta barnaklámsdóminn - fórnarlamb fékk frið á meðan

Karlmaðurinn, sem var dæmdur í sex og hálfs árs fangelsi í Héraðsdómi Reykjaness í dag, hlaut þyngsta dóm sem hafði fallið í barnklámsmáli árið 2007. Þá var hann dæmdur í árs óskilorðsbundið fangelsi. Hæstiréttur Íslands mildaði dóminn um tvo mánuði. Hann var engu að síður óskilorðsbundinn.

Í dóminum, sem féll í dag, má lesa hryllilegar lýsingar þar sem því er lýst þegar maðurinn nauðgar litla drengnum ítrekað yfir tíu ára skeið. Fram kemur í dóminum að einu hléin á hinu hryllilega kynferðisofbeldi, hafi verið þegar drengurinn var annarsvegar í sumarfríi, próflestri, og þegar níðingurinn afplánaði refsingu vegna barnagirndar sinnar.

Í úrskurði Hæstaréttar segir að maðurinn sé haldinn barnagirnd á alvarlegu stigi og meðferðir vegna hennar hafi ekki borið árangur. Maðurinn var meðal annars dæmdur í árs fangelsi árið 2001 fyrir að misnota tvo drengi, á svipuðum tíma og hann byrjaði að beita drenginn kynferðisofbeldi.

Þá hefur hann tvívegis verið dæmdur fyrir að hafa haft barnaklám undir höndum. Hann var einnig dæmdur fyrir vörslu barnakláms nú.

Maðurinn sem um ræðir er á fimmtugsaldri og bjó í Hafnarfirði þegar afbrotin áttu sér stað. Maðurinn var úrskurðaður í gæsluvarðhald í maí, þar sem hann er enn.