Milljarður á mínútu með Vaðlaheiðargöngum

„Við lifum á tímum þar sem þarf að fara verulega skynsamlega með hverju einustu krónu og það er öllum ljóst að Vaðlaheiðargöng falla ekki í þann flokk," segir Gísli Marteinn Baldursson, borgarfulltrúi Sjálfstæðisflokksins í Reykjavík.

Í gærmorgun birti hann stöðuuppfærslu á Facebook-síðu sinni þar sem hann sagði að samkvæmt sínum útreikningum væri tímasparnaður fyrir ökumenn vegna Vaðlaheiðarganga 11 mínútur. „Kostnaður vegna Vaðlaheiðarganga er 11 milljarðar. Semsagt milljarður á mínútu. Hver er ekki til í að borga milljarð fyrir að komast einni mínútu fyrr á áfangastað?“ sagði hann á síðu sinni.

Hann segist hafa reiknað þetta út með einföldum hætti og gert ráð fyrir því að menn keyri á 80 til 90 kílómetra hraða. Og útkoman: 11 mínútur sem sparast með göngunum.

Í samtali við fréttastofu segir Gísli Marteinn að honum finnist fáránleikinn endurspeglast í þessum framkvæmdum. „Mér sýnist á öllu að menn séu að rembast við að reikna sig niður á einhverja niðurstöðu sem að allt hlutlaust fólk sér að er ekki rétt. Þessi göng munu aldrei standa undir sér, miðað við þær forsendur sem eru gefnar.“

Gísli Marteinn segir að honum finnist þessar framkvæmdar vera mjög slæm meðferð á almannafé. „Ég tel að það sé makalaust að menn ætli að fara í þessa framkvæmd á meðan ríkið þarf að skera niður allstaðar,“ segir hann. „Mér finnst að þingmenn hér á suðvesturhorninu hafa ekki látið nógu mikið í sér heyra í svona málum. Það er náttúrulega ekki í lagi að gírugir þingmenn í kjördæmum út á landi komi málum í gegn án þess að það fari fram skynsamlega umræða um málið,“ segir hann.