Árni Páll: Ekki fyndið þegar ráðist er á mann í netheimum

„Þetta er greinilega eitt af því sem kemur upp í lífinu, en auðvitað er það ekki fyndið þegar menn eru að ráðast á mann í netheimum," segir Árni Páll Árnason, efnahags- og viðskiptaráðherra, en óprúttinn tölvuþrjótur hakkaði sig inn á heimasíðu ráðherrans og tilkynnti um afsögn hans í gær.

Það reyndist að sjálfsögðu ekki rétt en Árni Páll var staddur í Brussel á sama tíma og átti þar meðal annars fund með Olli Rehn, framkvæmdastjóra efnahagsmála hjá Evrópusambandinu.

Hann segist hafa haft samband við vistunaraðilann sem tók síðuna niður en sjálfur segist Árni Páll ekki hafa hugsað mikið um málið síðan, en hann er enn þá staddur erlendis.

„Ég ætlað að skoða þetta mál betur eftir helgina," segir Árni Páll sem hefur ekki tekið ákvörðun hvort hann ætli að kæra athæfið eða bregðast við því með öðrum hætti.

„Þetta er nú ekki alvarlegt í mínum huga, þannig lagað, en það var gott að ekkert tjón hlaust af þessu," segir Árni Páll sem er reyndar ekki eini stjórnmálamaðurinn sem hefur lent í tölvuþrjótum. Þannig lýsti Nicolas Sarkozy því yfir á Facebook-síðu sinni á síðasta ári að hann hygðist ekki bjóða sig aftur fram til forseta Frakklands. Það reyndist auðvitað staðlausir stafir og verk tölvuþrjóta.