Ráðherra sakaður um afskipti af sölu

Þingmenn Sjálfstæðisflokksins kröfðust þess að fjármálaráðherra gæfi þeim munnlega skýrslu um aðkomu sína að kaupum Magma Energy á hlut Geysis Green Energy í HS Orku. Vitnuðu þeir í frétt Morgunblaðsins, þar sem segir að Steingrímur J. Sigfússon hafi verið í leynimakki vegna málsins.

Bjarni Benediktsson, formaður Sjálfstæðisflokksins, segir ljóst að fjármálaráðherra hafi lagt blessun sína yfir að Magma eignaðist helmingshlut í HS Orku. Það hafi brotið í bága við yfirlýsingar umhverfisráðherra um pólitískan vilji fyrir því að fyrirtækið væri í innlendri eigu.

Ragnheiður Elín Árnadóttir, þingmaður Sjálfstæðisflokksins, vitnaði í Morgunblaðið þar sem sagt var að fjármálaráðherra hefði krafist fjölbreytni í viðskiptahópi fyrirtækisins.

Steingrímur segir það af og frá. Stjórnvöld hafi reynt að koma saman eigendahópi til að tryggja að HS Orka yrði að meirihluta, eða að minnsta kosti að helmingi, í eigu innlendra aðila. Það hafi öllum átt að vera ljóst, enda hafi verið margfjallað um málið í fjölmiðlum.

„Að öðru leyti var ekki fjallað um áform fyrirtækisins. Það var ekki verið að reyna að stýra því í hvað rafmagnið færi. Ég ræddi við Beaty [forstjóra Magma Energy] um almennar áherslur okkar um að auka fjölbreytni í orkunotkun. Beaty var sammála því, sem og því að æskilegt væri að fá sem hæst orkuverð. Þetta voru á engan hátt inngrip stjórnvalda," segir Steingrímur.

Katrín Júlíusdóttir iðnaðarráðherra segir allar hugmyndir stjórnvalda um orkusölu fyrirtækisins hafa verið hluta af framtíðarsýn, færi svo að ríkið gengi á einhvern hátt inn í kaupin. „Menn voru að skoða alvarlega hvort hægt væri að ná saman hópi opinberra aðila, lífeyrissjóða, sveitarfélaga og ríkis, til að tryggja að fyrirtækið færi ekki í eigu erlendra aðila. Allir vita hvernig fór."

Katrín segir fráleitt að tala um óeðlileg afskipti ráðherra. „Ég veit ekki til að fjármálaráðherra hafi einhver tök á að gefa HS orku einhver fyrirmæli."

kolbeinn@frettabladid.is