Krefur grasrótasamtök svara um fjölmiðlalög - ekki "T-fínt"

„Ég eiginlega trúði þessu ekki fyrst," segir Guðmundur Franklín Jónsson, sem er einn af þeim sem standa að undirskriftasöfnun gegn nýjum fjölmiðlalögum, á fjölmiðlalög.is, sem voru samþykkt á Alþingi um miðjan apríl. Hann fékk spurningalista frá Elíasi Jóni Guðjónssyni, aðstoðarmanni ráðherra, þar sem hann er krafinn svara um fullyrðingar sem hann heldur fram á heimasíðunni.

Tilefni þess að Elías sendir spurningarnar er texti á heimasíðunni þar sem ástæður áskoranna um að forsetinn synji lögunum staðfestingar eru reifaðar. Sjálfur skrifar Elías:

„Ég var að skoða síðu sem þú er titlaður ábyrgðaraðili á og hefur að geyma undirskriftarsöfnun við áskorun til Forseta Íslands um að hann synji lögum um fjölmiðla sem Alþingi samþykkti á föstudag staðfestingar. Ástæður áskorannarinnar eru listaðar upp á síðunni. Eru þær þess eðlis að ég verð að óska eftir svörum frá þér við eftirfarandi, sem er tekið úr áskorunartextanum, helst með vísunum í greinar frumvarpsins."

Elías spyr Guðmund meðal annars í hverju felist atlagan gegn sjálfstæði frjálsra fjölmiðla í frumvarpinu og fleiri spurningar í svipuðum dúr. Í lok bréfsins segir:

„Það er, eins og sjá má, afar mikilvægt að fá nákvæmlega úr þessu skorið, ekki síst þar sem þarna er því haldið fram að Alþingi hafi lögfest ritskoðun, gengið í berhögg við EES samninginn, gert atlögu að sjálfstæði fjölmiðla o.fl."

Guðmundur segist ringlaður eftir að hafa fengið spurningalistann. Hann átti sig ekki fyllilega á því hvort það sé Elías sjálfur sem spyr þessara spurninga eða hvort þær séu frá mennta- og menningamálaráðherranum sjálfum.

„Ég átta mig ekki á þessu. Er þetta persónulegt bréf frá Elíasi? Mér finnst þetta fáránlegt," segir Guðmundur sem er afar ósáttur við fjölmiðlalögin en sjálfur starfar hann á Útvarpi Sögu.

Aðspurður hvort spurningar Elíasar séu ekki eðlilegar og það sé mikilvægt að halda því sem er rétt til haga, svarar Guðmundur. „Þessum spurningum var svarað í meðförum frumvarpsins á þingi."

Guðmundur svaraði þó pósti aðstoðarmannsins. Þar óskar hann eftir skýringum á því í hvaða umboði hann sé að senda fyrirspurnirnar. Þar spyr Guðmundur meðal annars:

„Undirritaður óskar eftir skýringu á því af hverju aðstoðarmaður ráðherra telur það í verkahring sínum að óska skýringa frá grasrótarsamtökum?"

Og svo biður hann Elías um útskýringar á því hvernig hann hyggist nota þau svör sem kunna berast og í hvaða tilgangi.

Spurður hvað honum finnist um að fá þessar spurningar frá aðstoðarmanninum svarar Guðmundur, og vitnar í gamlan tölvupóst Elíasar sem lak í fjölmiðla í júlí á síðasta ári: „Mér finnst það ekki T-fínt."

Hér fyrir neðan má lesa spurningar Elíasar og svör Guðmundar.