Vantraust rætt í dag klukkan 16

Umræða um tillögu þingflokks Sjálfstæðisflokksins um vantraust á ríkisstjórnina, þingrof og nýjar kosningar hefst klukkan fjögur í dag og stendur fram á kvöld. Umræðunni eru ætlaðar fimm klukkustundir og verður atkvæðagreiðsla að henni lokinni.

Þingflokksformenn höfðu deildar meiningar um hve lengi umræðan ætti að standa og hvenær dags hún skyldi fara fram. Þurfti þrjá fundi til að komast að ofangreindri niðurstöðu. Inn í spilaði að allnokkrir þingmenn voru í embættiserindum í útlöndum. Var ferðaáætlunum breytt eins og kostur var, svo þeir næðu heim í tæka tíð.

Erfitt er að segja til um hvernig atkvæði munu falla enda stangast hugmyndir manna um atkvæðaráðstöfun annarra á. Sem dæmi um það sagðist Bjarni Benediktsson á Rás 2 í gær gera ráð fyrir að stjórnarandstaðan greiddi öll atkvæði með tillögunni, þar með talin Hreyfingin. Heimildarmaður Fréttablaðsins úr röðum stjórnarliða sagðist á hinn bóginn telja að Hreyfingin myndi greiða atkvæði gegn tillögunni.

Margrét Tryggvadóttir, þingmaður Hreyfingarinnar, sagði hins vegar í samtali við blaðið að afstaða flokks hennar lægi alls ekki fyrir. „Við ætlum að tala við okkar bakland í kvöld [gærkvöldi] og taka ákvörðun eftir það."

Að sama skapi eru yfirlýsingar framsóknarþingmannanna Höskuldar Þórhallssonar og Sigmundar Davíðs Gunnlaugssonar formanns misvísandi. Höskuldur sagðist við Vísi telja óvíst að þingflokkurinn styddi tillöguna en á RÚV sagði Sigmundur flokk sinn styðja hana. Fréttablaðið hefur svo vitneskju um að í það minnsta einn þingmaður Framsóknarflokksins hyggist sitja hjá.