Quarashi undirbýr endurkomu

Hljómsveitin Quarashi fagnar því í ár að fimmtán ár eru liðin frá því að meðlimir sveitarinnar komu fyrst saman. Vísir hefur heimildir fyrir því að af þessu tilefni muni hljómsveitin vera að íhuga að koma saman að nýju í eitt skipti í sumar.

Um verður að ræða tónleika á útihátíð aðra helgina í júlí sem heitir Besta útihátíðin. Það verða upphaflegir meðlimir sveitarinnar sem munu koma saman, þeir Sölvi Blöndal, Steinar Fjeldsted, Höskuldur Ólafsson og Ómar Örn Hauksson.

Hljómsveitin Quarashi hætti að koma reglulega saman árið 2005. Þá höfðu þeir reynt fyrir sér í Bandaríkjunum og slegið rækilega í gegn í Japan. Þeir gáfu út sex hljómplötur.

Meðlimir Quarashi vildu ekkert tjá sig um málið þegar Vísir leitaði viðbragða þeirra.

Þeir sem eru óþreyjufullir geta stytt sér stundir með því að hlusta á lagið Mr. Jinx sem fylgir í myndskeiði með þessari frétt.

Hér má svo skoða fésbókarsíðu Bestu útihátíðarinnar.