Íhugar að skrifa aðra grein um frægðina - og öndum með nefinu

„Mér sýnist stefna í follow-up celebrity grein," skrifar Ragnar Egilsson á Facebook-síðu sína, en hann ritaði umdeilda grein í Reykjavík Grapevine á dögunum. Þar fer Ragnar hörðum orðum um umtalaðasta fólkið á Íslandi í dag, þau Jón Hilmar Hallgrímsson, Völu Grand, Gillzenegger, Tobbu Marínós og Ásdísi Rán. Segja má að hann geri stólpagrín að þeim öllum.

Í greininni skrifar Ragnar meðal annars: „Flest frægt fólk á Íslandi er tilgangslausar frægðarhórur sem þrífst á sviðsljósinu eins og það sé því nauðsynlegt fyrir ljóstillífun."

Þá segir pistlahöfundur að Tobba Marínós sé kvenkynsútgáfan af Gillz. Hún sé stefnumótaráðgjafi og slúðurdrottning sem hafi unnið sér frægð einhvern tímann á síðasta ári.

Greinin fór reyndar svo fyrir brjóstið á Tobbu að hún sá sig knúna til þess að senda Ragnari bréf þar sem hún sagði honum til syndanna vegna greinarinnar. Hún sagði ummælin vera særandi og niðrandi og að þau jöðruðu við að vera einelti.

Ragnar hafði engan áhuga á að ræða málið í fjölmiðlum þegar Vísir hafði samband við hann. Hann sagði að þá væri hann eiginlega að ganga þvert á það sem hann skrifaði. Hann vildi ekki taka þátt í farsanum.

Ragnar er þó kokhraustur á Facebook-síðu sinni og virðist velta því fyrir sér að skrifa framhaldsgrein um málefnið eldfima. Hann bætir svo við:

„Og öndum með nefinu - til þess er það."