Hanna Birna vill ekki í ríkisstjórn með Samfylkingunni vegna ESB

Hanna Birna Kristjánsdóttir telur að Sjálfstæðisflokkurinn eigi ekki að mynda ríkisstjórn með Samfylkingu fyrr en samfylkingarmenn breyta um kúrs í evrópumálum. Hún telur vænlegast að halda í krónuna áfram.

Landsfundur sjálfstæðismanna hefst á fimmtudaginn en Hanna Birna hefur boðið sig fram til formanns á móti Bjarna Benediktssyni.

Hanna Birna var gestur Sigurjóns M. Egilssonar í þættinum Sprengisandur í morgun og var hún meðal annars spurð hvort réttast væri að taka upp annan gjaldmiðil hér á landi.

„Ég er þeirrar skoðunar að við eigum að halda í krónuna áfram. Við eigum að skoða það næstu þrjú til fimm ár hvort aðrir kostir séu betri. En miðað við núverandi aðstæður þá finnst mér að við eigum að halda í krónuna og ég held að hún sé besti kosturinn fyrir okkur. Ég held líka að stundum sé það þannig að við nálgumst gjaldmiðilinn eins og hann sé ástæðan fyrir ástandinu. Gjaldmiðill er ekkert annað en hitamælir á eitthvað ástand og við brjótum hann ekki ef illa gengur," sagði Hanna Birna í morgun.

Hanna Birna sagðist vera andvíg aðildarumsókn Íslands að Evrópusambandinu og telur ólíklegt að sjálfstæðismenn geti myndað ríkisstjórn með Samfylkingunni eftir næstu alþingiskosningar nema að Samfylkingin breyti um stefnu í evrópumálum.

„Ég hef líka sagt það, af því að menn hafa nefnt það hvort að menn vilj ekki semja við Samfylkinguna, gera menn Evrópusambandið að úrslitaatriði þar? Klárlega. Við, Sjálfstæðisflokkurinn viljum ekki ganga í Evrópusambandið og viljum ekki semja um það nema landsfundur flokksins taki breytta afstöðu í þeim málum. Það er ekkert sem formenn geta unnið með, við erum bundin af samþykktum landsfundar. Og samþykktir landsfundar eru mjög afdráttarlausar hvað þetta varðar og mér finnst það sama upp á teningnum eins og hvað til dæmis Vinstri-Græna varðar. Við munum ekki semja við þá um hækkun skatta en séu menn reiðubúnir í það, að mætast á miðri leið þá finna menn flötinn á því, en sumir hlutir eru illsemjanlegir," sagði Hanna Birna í Sprengisandi í morgun.