Enn á leið í klippingu - myndir af hjólastólnum

Fötluð kona í hjólastól sem var neitað um klippingu á dögunum vegna þess hversu fyrirferðarmikill hjólastóllinn hennar væri, er afar ánægð með þá umræðu sem komin er í gang um stöðu fatlaðra. Hún ætlar brátt að gera aðra tilraun til að fara í klippingu.

Fréttastofa greindi frá því á dögunum að Hanna Dóra Stefánsdóttir, þroskaþjálfi, hafi farið með fatlaða konu á hárgreiðslustofu í Hafnarfirði en þeim verið vísað frá. Hönnu Dóru fannst þessi framkoma við fötluðu konuna svívirðileg og vildi vekja athygli á málinu.

„Jú, við höfum fengið mjög mikil viðbrögð og mjög mikil jákvæð viðbrögð. Fólk er alveg yfir sig bit og margir sem eru boðnir og búnir að veita konunni klippingu, bæði einstaklingar sem eru tilbúnir að borga, hárgreiðslustofur og hárgreiðslumeistarar sem hafa haft samband við mig, þannig að þetta eru mjög jákvæð og flott viðbrögð," segir hún.

Og er hún búin að fara í klippingu?

„Nei, við þurfum að láta öldurnar lægja aðeins áður en við veljum einhverja stofu sem er tilbúin að klippa hana," segir hún.

Hanna Dóra segir þó að konan sé meira en tilbúin til að borga sjálf fyrir klippinguna. Markmiðið hafi verið að vekja athygli á stöðu fatlaðra.

Að sögn Hönnu Dóru finnst konunni sjálfri að hún hafi grætt á umfjölluninni.

„Það er meiri umgengni við hana, fólk er meira að tala við hana og bara jákvæðara í alla staði þegar það hittir hana," segir hún.

Konan er sjálf mjög fötluð en nýtur þeirrar jákvæðu athygli sem hún hefur fengið að undanförnu.

„Hún er dálítið mikið fötluð, hún skilur mikið en hún getur ekki tjáð sig," segir Hanna Dóra.

En hún er allavega ánægð núna og bara í leiðinni í klippingu á næstunni?

„Já, hún er ánægð. mjög ánægð," segir hún.

Eigandi hárgreiðslustofunnar í Hafnarfirði sagði hjólastól konunnar gera það að verkum að starfsfólk ætti mun erfiðara um vik en ef hún væri í venjulegum hjólastól. Hér meðfylgjandi eru nokkrar myndir af sérsmíðaða stólnum hennar.