Íslenski hesturinn í útrás

Nú stendur yfir undirbúningur fyrir heimsmeistaramót íslenska hestsins í Berlín tvöþúsund og þrettán. Búist er við hátt í tvö hundruð þúsund gestum á mótið og yfir þúsund íslenskum hestum.

Heimsmeistaramót íslenska hestsins eru haldin á tveggja ára fresti, síðast í Austurríki í sumar, en undirbúningur fyrir næsta mót í Berlín árið 2013 hefur staðið yfir í tvör ár.

„Þetta er í fyrsta skipti sem að heimsmeistaramótið er haldið í stórri borg. Það eru fimm milljón manns í Berlin, og við ætlum með þessu öllu að færa íslenska hestinn til fólksins. Það er meira að segja talað um að þúsund hestar ríði í gegnum Brandenborgarhliðið ef það tekst þá er það mesta auglýsing sem nokkurn tíman hefur verið gerð fyrir íslenska hestinn," segir Herbert Ólafsson, hestamaður.

Hann segir mótið einstakt tækifæri fyrir íslensk fyrirtæki að minna á sig.

„Ekki bara í hestageiranum heldur í mörgum öðrum greinum þetta er mjög stórt tækifæri fyrir almenna íslandskynningu, ferðaþjónustuna og önnur fyrirtæki sem eru í contact við þýskaland og evrópu yfir höfuð," segir Herbert.

Aðstandendur mótsins eru nú staddir hér á landi við að kynna mótið fyrir íslenskum fyrirtækjum og munu halda kynningarfund í Íslandsstofu á mánudaginn.

„Við erum að búast við allt að 15 - 16 þúsund manns á dag hérna í Berlin, sem þýðir allt í allt einhver tæp 200 þúsund," segir Henning Drath, upplýsingafulltrúi heimsmeistaramótsins.