Sálfræðingur Guðrúnar Ebbu borinn þungum sökum

Með staðhæfingum um falskar minningar Guðrúnar Ebbu Ólafsdóttur er verið að bera sálfræðing hennar þungum sökum. Þetta segir formaður Sálfræðingafélags Íslands.

Þegar talað er um falskar minningar er í raun verið að ræða um meðferðir sem voru mikið í umræðunni á níunda áratugnum þar sem meðferðaraðilar náðu í minningar sem talið var að hefðu verið bældar niður.

„Þá komu upp mörg mál í Bandaríkjunum og Bretlandi þar sem þetta reyndist svo ekki rétt, það sem fólk mundi eftir, og meðferðaraðilarnir plöntuðu minningunum inn hjá skjólstæðingum sínum," segir Pétur Tyrfingsson, formaður Sálfræðingafélags Íslands.

Séra Skúli Ólafsson sagði í viðtali Kastljóss í gær að hann teldi minningar systur sinnar, Guðrúnar Ebbu Ólafsdóttur, ekki vera raunverulegar heldur falskar. Þá sagði hann falskar minningar vera afleiðingu þess að fólk fer í samtalsmeðferð.

Pétur segir mikilvægt að fólk átti sig á því hvað það er að segja þegar það talar um falskar minningar.

„Ég sem formaður Sálfræðingafélags Íslands vil benda á að með því að gera það þá er þarna er auðvitað verið að bera félagsmann mjög þungum sökum. Ég veit ekki til þess að nokkur af mínum félagsmönnum beiti þessari aðferð," segir Pétur.

Kallað hefur verið eftir því að sálfræðingar sem fagaðilar taki þátt í umræðu um falskar minningar í tengslum við þetta viðkvæma og persónuleg mál.

„Slík umræða getur í raun ekki farið fram. Það er ekki siðfræðilega réttlætanlegt. Við erum ekki tilbúnir að gefa út miklar yfirlýsingar," segir Pétur.