Var 150 kíló - sá ljósmynd og fékk nóg

Ljósmynd sem tekin var í kvennafélagsferð varð til þess að kona, sem orðin var tæp hundrað og fimmtíu kíló, ákvað að tímabært væri að gera eitthvað í sínum málum.

Hún segir of stóra skammta á veitingastöðum vandamál og telur að breyta þurfi hugsunarhættinum í samfélaginu til að sporna við offitu.

Við höfum sagt frá því að þrjú hundruð og fimmtíu manns eru á biðlista eftir því að komast í offitumeðferð á Reykjalundi og biðin lengist sífellt. Flestir sem fara í gegnum meðferðina fara síðan í hjáveituaðgerð á Landspítalanum.

Andrea Anna komst inn í meðferðina í febrúar 2007. Þremur árum áður sá hún ljósmynd af sér í kvennafélagsferð og ákvað þá að gera eitthvað í sínum málum.

„Þá fékk ég áfallið," lýsir Andrea Anna og bætir við: „Ég var orðin 148,9 kíló. Ég var með háan blóðþrýsting sem ég fékk að vísu líka eftir meðgöngu. Ég þyngdist mjög mikið eftir meðgöngu."

Hún ákvað í framhaldinu að leita til Trausta Valdimarssonar, meltingafærasérfræðings á Akranesi. Áður en hún hitti hann létti hún sig um nokkur kíló.

„Hann sagði bara við mig að ég væri að drepa mig úr offitu. Sem var náttúrulega mikið sjokk.

Andrea segist alltaf hafa haft mikinn áhuga á mat.

„Ég hef oft sagt að ég sé kokkur af guðs náð og eldaði bara mjög góðan og mikinn mat. Það var svona mín ástríða og kokkabækur og ýmislegt svoleiðis sem varð til þess að ég fór þangað sem ég fór."

Hún segir mikilvægt að breyta hugsunarhættinum í samfélaginu til að sporna við offitu. Þannig sé brauðmeti yfirleitt það fyrsta sem fólk sér þegar það kemur inn búið og sælgæti það síðasta sem fólk sér við kassann.

Þá séu oft mjög stórir skammtar í boði á veitingastöðum og ódýrt að stækka máltíðir. Fólk sé oft hissa ef einhver vill ekki stærri skammt eða franskar með.

Áður en Andrea fór í hjáveituaðgerð hafði hún losað sig við 47 kíló meðal annars í offitumeðferðinni á Reykjalundi. Hún fór í aðgerðina til að losa sig við 43 kíló sem hún átti eftir til að komast í kjörþynd. Í dag er hún sextíu kíló.

„Nú er maður farinn að hreyfa sig meira og fjallgöngur. Ég er búin að klífa Hvannadalshnjúk og er búin að fara Laugarveginn með bakpoka á bakinu. Þannig að það eru hlutir sem ég hefði aldrei getað gert. Þannig að það er allt miklu léttara."