Tannheilsan verst á Íslandi

Tannheilsa Íslendinga er mun verri en annarra Norðurlandabúa þrátt fyrir að tannlæknar séu hlutfallslega fleiri á Íslandi. Ungmenni hér á landi fá fjórfalt fleiri skemmdir en danskir jafnaldrar þeirra.

Í nýrri rannsókn velferðarráðuneytisins er dökk mynd dregin upp af tannheilsu Íslendinga. Þegar litið er til tannheilsu 12 ára barna er munurinn á heilsu landsmanna og annarra Norðurlandabúa sláandi. Íslenskir tannlæknar finna að meðaltali rúmlega tvær skemmdir hjá þessum aldurshópi í hverri heimsókn sem er helmingi fleiri skemmdir en hjá norskum börnum sem koma næst verst út úr þessari úttekt, og tæplega fjórfalt fleiri en hjá dönskum ungmennum.

Þá er eldra fólk hér á landi líklegra, ásamt Finnum, til að missa tennur sínar, en 33% Íslendinga á aldrinum 65 til 74 ára eru ekki með sitt upprunalega sett miðað við 18% Dana og 7% Norðmanna.

Í þessu samhengi vekur fjöldi tannlækna hér á landi athygli, en þeir eru hlutfallslega fleiri en á öðrum Norðurlöndum. 94 tannlæknar eru á hverja hundrað þúsund íbúa en í Noregi eru þeir 88, í Danmörku 84 og Svíþjóð 83 og einungis 74 í Finnlandi, en munurinn á Finnlandi og Íslandi eru tuttugu tannlæknar. Vert er þó að geta að fjöldi tannlækna sem hreinsa einungis tennur eru mun færri hér á landi en í hinum fjórum löndunum.

Rannsóknin nær einnig til útgjalda vegna tannlækninga sem jukust um fimm prósent á árunum 2008 til 2010 en kostnaðarhlutdeild sjúklinga jókst um heil 7% á þessu tímabili. Það er því ekki að sjá að útgjaldaaukningin né góður fjöldi tannlækna hafi skilað betri tannheilsu.