Bilaður jarðskjálftamælir sýndi skjálfta upp á 9,4 á richter

Jarðskjálftamælar hjá Veðurstofu Íslands sýndu kraftmikla jarðskjálfta víða um land í kvöld. Þannig var að sjá á vef þeirra að jarðskjálfti upp á 9,4 á richter hafi verið 50 kílómetra frá Blönduósi og annar skjálfti upp 6,2 suðvestur af Hólmavík.

Þegar fréttastofa hringdi í veðurstofuna í kvöld fengust þær útskýringar að einn jarðskjálftamælir á vegum veðurstofunnar er bilaður og bjó til ímyndaða skjálfta, eða hreyfingu, á öðrum mælum. Vaktmaður hjá veðurstofunni segir að þetta sé allt saman „feik" en unnið er að því að taka mælinn út og býst hann við að jarðskjálftarnir fari út af vefnum innan skamms.