Engin skýrsla af sjeiknum

Ekki hefur enn tekist fá skýrslu frá aðal vitninu í ein stærsta sakamáli efnahagshrunsins, sem er til rannsóknar hjá sérstökum saksóknara, kaup sjeiksins Al-Thani á hlutabréfum í Kaupþingi. Sjeikinn nýtur diplómatískrar friðhelgi og hefur ekki orðið við ósk um að bera vitni í málinu.

Rannsókn embættis sérstaks saksóknara á kaupum sjeiks Mohammed Bin Khalifa Al-Thani á 5 prósenta hlut í Kaupþingi í september 2008 fyrir 25,6 milljarða króna er mjög langt komin, en kaupin eru álitin sýndarviðskipti af embættinu og eru stjórnendur Kaupþings grunaðir um markaðsmisnotkun.

Embættið lagði á það ríka áherslu á fyrri stigum rannsóknar að fá sjeikinn sjálfan, sem er bróðir emírsins í Katar, til að bera vitni í málinu. Meðal annars var reynt að fá hann til að gefa skýrslu í gegnum lögmann sinn í Lundúnum. Samkvæmt heimildum fréttastofu hefur þetta ekki gengið eftir, en sjeikinn nýtur til dæmis diplómatískrar friðhelgi og þarf því ekki að gefa skýrslu á grundvelli beiðni um yfirheyrslu, en slík beiðni fer í gegnum svokallaða gagnkvæma réttaraðstoð við meðferð sakamála milli landa (e. mutual assistance). Samkvæmt heimildum fréttastofu hefur sjeikinn því ekki gefið skýrslu í málinu.

Margt er enn á huldu um sjeikinn sjálfan. Til dæmis hafa allar myndir sem birst hafa af honum í íslenskum fjölmiðlum ekki af honum og raunar hafa allir fjölmiðlarnir verið að nota sitt hvora myndina, en Al-Thani er jafn algengt nafn í Katar og Jón er hér á landi. Til dæmis höfum við á Stöð 2 verið að nota eina mynd, Rúv hafa notað aðra og þriðja myndin hefur verið notuð í Morgunblaðinu. (Sjá myndskeið með frétt). Enginn þessara manna er sjeikinn Al-Thani, bróðir emírsins í Katar. Engar myndir virðast vera til af sjeiknum á netinu, en ljósrit af vegabréfinu hans var skilað til fyrirtækjaskrár þegar eignarhaldsfélag hans hér á landi var stofnað.

Í raun og veru eru tveir Al-Thani í málinu. Það er bróðir emírsins, sjeik Al-Thani og svo ráðgjafi hans, Sultan Bin Jassim Al-Thani, sem er í konungsfjölskyldunni og starfar sem fjármálaráðgjafi sjeiksins. Það er þessi maður sem vingaðist við Ólaf Ólafsson, meðal annars í gegnum sameiginleg áhugamál eins og hestamennsku og veiðar. Og kom hingað til lands í boði Ólafs sumarið 2008 og skoðaði m.a Flatey. Sérstakur saksóknari fékk vitnisburð súltansins í október 2009, eða fyrir réttum tveimur árum.

Ólafur Þór Hauksson, sérstakur saksóknari, vildi ekkert láta hafa eftir sér um málið þegar eftir því var leitað á grundvelli rannsóknarhagsmuna. Eins og áður segir er rannsókn málsins mjög langt komin og eftir því sem fréttastofa kemst næst gæti henni verið lokið fyrir lok þessa árs.