Eldingar valda truflunum hjá Orkuveitu Reykjavíkur

Heitavatnsdælum sló út á höfuðborgarsvæðinu um áttaleytið í kvöld vegna spennusveiflna í rafmagnskerfinu, en eldingum hefur slegið niður víða á Suður- og Vesturlandi í kvöld.

Truflanirnar gætu valdið lágum þrýstingi á heitu vatni á höfuðborgarsvæðinu. Unnið er að því að koma dælunum í gang að nýju, en þeim slær út við spennusveiflur á borð við þær sem urðu í kvöld. Er þetta gert til þess að varna því að tjón verði á dælunum.

Rekstrartruflanir urðu einnig í jarðvarmavirkjunum OR á Hellisheiði og á Nesjavöllum við sveiflurnar.

Rafmagni sló einnig út víðsvegar á höfuðborgarsvæðinu í kvöld, og hefur það að sama skapi verið rakið til eldinganna.