Grétar Sigfinnur: Mætum með fimm stjörnur á Hlíðarenda

„Það er virkilega gaman að vinna tvöfalt. Bara frábært ár hjá KR. Við unnum tvöfalt í körfunni og tvöfalt í fótboltanum. Maður verður ekki þreyttur á að segja það," sagði Grétar Sigfinnur Sigurðarson sigurreifur miðvörður KR.

Grétar, sem er uppalinn KR-ingur, hefur meðal annars spilað með Víkingi og Val áður en hann sneri aftur á heimaslóðir fyrir nokkrum árum. Titillinn hlýtur að hafa mikla þýðingu fyrir Vesturbæinginn.

„Algjörlega. Að vera hluti af þessu liði. Það eina sem maður vildi var að koma aftur heim og feta í fótspor frægra manna á borð við Þormóðs Egilssonar og fleiri hetja."

Fylkismenn börðust um hvern einasta bolta og gerðu KR-ingum erfitt fyrir. Reyndust erfiðari mótherji en margir reiknuðu með enda höfðu þeir að engu að keppa.

„Nei, ekki frekar en hvert lið sem við höfum mætt í sumar. Við kannski gerðum okkur svolítið erfitt fyrir seinni hluta sumars. Við sýndum gríðarlegan karakter, töpuðum aðeins einum leik og þetta er gríðarlega flott."

Grétar segir stemmninguna í leikmannahópi KR afar góða.

„Hún er náttúrulega svakalega góð með valinn mann í hverju rúmi. Skemmtilegur hópur. Maður hefur oft verið hluti af góðri stemmningu en þegar vel gengur er bara gaman. Það hefur ekki verið tími í sumar sem maður hefur verið fúll eða verið leiðinlegt. Þetta er búið að vera gríðarlega gaman."

„Það er gaman að það stendur enginn einn upp úr í þessu liði. Það hafa allir verið frábærir. Menn sem hafa komið af bekknum hafa líka skilað sínu hlutverki. Það hefur verið lykillinn að þessum sigri."

Grétar segir að það hafi verið erfitt fyrir KR-inga að halda sér á jörðinni í sumar. Liðið spilaði frábærlega í sumar, sérstaklega fyrri hluta sumars, og margir töldu formsatriði að liðið tryggði sér titilinn.

„Jú, algjörlega. Við erum í KR og það er alltaf pressa. Við höfum lifað við það frá því Íslandsmótið var stofnað. Auðvitað lendum við í miklum meiðslum og bönnum. Það hefur kannski verið erfiðara fyrir okkur en að halda okkur á jörðinni."

KR-ingar hafa fjórar stjörnur á búningi sínum en 25. Íslandsmeistaratitillinn þýðir að stjörnunum mun fjölga í fimm.

„Þær verða fimm á Hlíðarenda næstkomandi laugardag. Það verður gaman. Þangað mætum við með titilinn. Valsmenn vildu fá titilinn á 100 ára afmælinu og við ætlum að verða við þeirri ósk," sagði Grétar léttur.