Tollverðir þykja of líkir lögreglunni

Lögreglumenn eru ósáttir við nýjan einkennisklæðnað tollvarða sem þykir nokkuð líkur þeirra.

Í byrjun mánaðarins tók tollgæslan upp nýja einkennisbúninga. Þeir eru svartir og þykja svipa nokkuð til einkennnisbúninga lögreglunnar. Báðir búningarnir eru svartir með giltum merkingum á bringu og öxlum. Helsti munurinn er gylltur skjöldur á klæðnaði tollvarða

Rúmur áratugur er síðan tollgæslan breytti einkennisbúningum sínum síðast og þótti tímabært að breyta til

Guðbjörn Guðbjörnsson, yfirtollvörður, segir að á þessum tíma hafi verið heilmikil þróun. Bæði varðandi efni og útlit fata. Tískan hafi breyst og auðvitað vilji menn sem eru klæddir í einkennisföt alla daga tolla í tískunni.

Geir Jón Þórisson, yfirlögregluþjónnn, segir lögregluna hafa breytt búningunum sínum árið 2007. Þeir hafi valið svarta búninga til að aðgreina sig frá öðrum einkennisklæddum fagstéttum en fyrirmyndina hafi þeir sótt til Bandaríkjanna. Hann er ósáttur við að tollverðir hafi líka valið sér svartan sem sinn einkennislit. Það sé gott að lögreglan sé vel merkt, skeri sig út og fólk sjái að um lögregluna sé að ræða.

Guðbjörn segir að fáir litir hafi komið til greina. Þeir hafi áður verið í svörtum jökkum og buxum og hvítri skyrtu svo í raun og veru hafi aðeins skyrtuliturinn breyst. Ástæðan fyrir því að svartar skyrtur hafi orðið fyrir valinu var meðal annars praktísk þar sem lítið sést á þeim lit. Hann telur ekki að fólk ruglist að tollvörðum og lögreglumönnum þar sem tollverðir séu merktir í bak og fyrir.