Íslenski boltinn

Ólafur: AEK er að ráðskast með okkar leikmann

Henry Birgir Gunnarsson skrifar
Elfar Freyr, númer 5, fagnar hér með Blikum.
Elfar Freyr, númer 5, fagnar hér með Blikum.
Breiðablik er allt annað en ánægt með gríska liðið AEK Aþenu og gömlu Blikaoðsögnina, Arnar Grétarsson, sem er yfirmaður íþróttamála hjá gríska liðinu.

Elfar Freyr kom ekki til móts við Breiðablik í Þrándheimi í gær en hann fór til Grikklands á sunnudag þar sem hann gekkst undir læknisskoðun hjá gríska liðinu.

Elfar fékk leyfi til þess gegn því að hann kæmi til Þrándheims daginn eftir en þar mætir Breiðablik liði Rosenborg í Meistaradeildinni annað kvöld. Þann leik spilar Elfar ekki.

Eftir því sem Ólafur Kristjánsson, þjálfari Breiðabliks, segir þá setti AEK Aþena leikmanninum afarkosti. Ef hann spilaði leikinn gegn Rosenborg þá fengi hann ekki samning við AEK. Hann yrði ekki löglegur með AEK í Evrópukeppninni í vetur ef hann tæki þátt í leiknum á morgun.

„Við erum engan veginn sáttir. Elfar er leikmaður Breiðabliks og það er ekki búið að skrifa undir samning við AEK sem gerir málið enn grófara. Þeir voru í raun og veru að ráðskast með leikmenn annars liðs. Það er erfitt að sætta sig við það," sagði Ólafur við Vísi.

Nánar er rætt við Ólaf í Fréttablaðinu á morgun.






Fleiri fréttir

Sjá meira


×