Lögin falla ekki úr gildi á hátíðisdögum og íþróttaviðburðum

"Það er eins og fólk hafi talið að ef einhver viðburður er í gangi; Menningarnótt, 17. júní, íþróttakappleikur eða annað, þá bara detti lögin úr gildi og menn geti verið í villta vestrinu."

Þetta segir Guðbrandur Sigurðsson, aðalvarðstjóri umferðadeildar, en lögreglan hefur verið iðin við það undanfarið að deila út stöðubrotsgjöldum á stórum viðburðum þar sem fólk grípur oft til þess ráðs að leggja á grasblettum og víðar vegna skorts á bílastæðum.

Að sögn Haraldar Haraldssonar, framkvæmdastjóra knattspyrnufélagsins Víkings, hefur lögreglan mætt á nánast alla leiki félagsins í vor og smeygt miðum undir rúðuþurrkur bifreiða á svæðinu. Bílastæði við heimilið eru færri en 80 talsins en rúmlega 1500 manns mættu á leik Víkings og Fram í gær. Guðbrandur segir Víkingsheimilið hinsvegar ekki hafa fengið meiri athygli en önnur viðburðasvæði, lögreglan reyni einfaldlega að fylgjast með því hvar sé von á miklum fjölda fólks.

Aðspurður hvort hægt væri að fara aðrar leiðir til að sporna við stöðubrotum sem þessum segir Guðbrandur það vera starf sveitafélagsins að vinna bætur á bílastæðamálum. "Við búum ekki til bílastæði, við framfylgjum bara lögum."

Stöðubrotsgjöld nema 5000 krónum, en féð rennur í ríkissjóð og að hluta til í bílastæðasjóð. Að sögn Guðbrands rennur enginn hluti gjaldanna til lögreglu, aukin eftirfylgni laganna af hálfu lögreglu hvað stöðubrot varðar sé því á engan hátt fjáröflun.

Guðbrandur segir að mun færri leggi ólöglega nú eftir að átakið fór af stað, ástandið hafi stórlagast.