Héldu að Vatnsberinn væri dottinn í það

„Ef þú strýkur og átt svona mikla hagsmuni undir, þá hlýtur eitthvað að vera komið í mikið ójafnvægi," segir Páll Winkel fangelsismálastjóri aðspurður um hvers vegna fanga var lýst sem hættulegum í tilkynningu en er án eftirlits á meðferðarheimili og á hjartadeild Landspítalans.

Þór Óliver Gunnlaugsson, sem afplánar dóm fyrir morð og lögregla lýsti eftir í gær, var ekki í fylgd lögreglumanna eða fangavarða þar sem hann var í læknismeðferð á Landsspíltanum og þá er hann ekki undir eftirliti á meðferðarheimilinu Hlaðgerðarkoti. Í tilkynningu í gær sagði að Þór væri hættulegur.

Páll segir að Þór hafi ekki verið metinn hættulegur síðustu ár en hann hefur verið í fangelsi samtals í ellefu ár og átti að losna út eftir tvo til þrjá mánuði. „En þegar að menn sem kjósa að strjúka, tala nú ekki um svona rétt áður en afplánun lýkur, þá hlýtur eitthvað að vera að - menn hljóta að vera dottnir í það eða eitthvað þess háttar," segir Páll.

„Þá er allt tekið, þá segjum við að hann sé hættulegur. Venjulega þegar menn strjúka af meðferðarheimilum og einhverjir svona minni spámenn, skulum við segja, þá látum við bara lögregluna vita og hún leitar að viðkomandi í rólegheitunum en þarna var bara ákvörðun tekin: Við tilkynnum lögreglunni þetta, gefum út handtökubeiðni og látum fjölmiðla strax vita," segir hann.

„Þetta er frá okkur komið, við segjum að hann sé hættulegur því hann strýkur þrátt fyrir að hann hafi hegðað sér vel og engar líkur eru á að hann sé öðrum hættulegur, þetta er bara svona maður og þá gerum við þetta svona," segir Páll en Þór var dæmdur í sextán ára fangelsi fyrir morð árið 1999.

Þór átti að ljúka afplánun eftir nokkra mánuði en Páll segir að hann sé ekki talinn vera hættulegur. „En eins og gengur og gerist ef að menn detta í það þá geta þeir verið mjög hættulegir. Hann er búinn að vera á þessu meðferðarheimili í einhvern tíma og þar áður í opnu fangelsi," segir Páll.

Þór var ekki eftirlýstur lengi því hann skilaði sér á meðferðarheimilið nokkrum mínútum eftir að lýst var eftir honum í fjölmiðlum. „Svo er það hvort að þetta sé eiginlegt strok því hann pantar sér leigubíl og fer aftur upp á meðferðarheimilið,“ segir hann.