Slapp naumlega þegar bíllinn fór í sjóinn

Karlmaður á miðjum aldri slapp naumlega út úr bíl sínum, sem rann fram af bryggju við kaffivagninn á Grandagarði á örðum tímanum í nótt og sökk til botns. Vitni kallaði á björgunarlið og hélt maðurinn sér við bryggjuna, í sjónum, þegar lögregla og sjúkraflutningamenn komu á vettvang.

Hann var þegar fluttur, blautur og hrakinn, á slysadeild Landspítalans til aðhlynningar, þar sem hann dvaldi í nótt, en er á góðri bataleið. Kafarar frá Ríkislögreglustjóra komu böndum á bílinn, sem var hífður upp á bryggjuna í nótt. Ekki er vitað um tildrög þess að svona fór.