Þuríður Backmann líklega þingflokksformaður

Ákveðið var á þingflokksfundi VG í dag þar sem Árni Þór Sigurðsson vék til hliðar sem formaður þingflokksins að Þuríður Backman tæki við keflinu. Hún var varaformaður þingflokksins. Þuríður hafði hinsvegar ekki fengið þessar fregnir þegar fréttastofa náði tali á leið til útlanda. Hún sagðist því ekki vilja tjá sig um það hvort hún taki við sæti þingflokksformanns, fyrst vildi hún heyra í sínu fólki.

Á fundinum var fyrst borin upp sú tillaga að gera Guðfríði Lilju Grétarsdóttur að þingflokksformanni að nýju. Guðfríður sjálf baðst hinsvegar undan því og stakk upp á því að Þuríður yrði gerð að formanni.

Aðspurð um ákvörðun Árna Þórs að stíga til hliðar, segist Þuríður skilja hann mjög vel en Árni hefur verið harðlega gagnrýndur af samflokksmönnum sínum. „Það hefur verið mjög ómaklegt það sem á honum hefur dunið og snúið út úr öllu sem hægt er að snúa út úr," segir Þuríður.

Hún bendir á, eins og Árni hefur einnig gert að Árni hafi verið starfandi þingflokksformaður stærstan hluta þessa þings og því eðlilegt að hann kláraði það litla sem eftir væri. „Mér fannst þetta virkilega ómaklegt og ég hef ekki hugmyndaflug í það hvernig mönnum tókst að tengja þetta kjör við hina ýmsu hluti sem koma því ekkert við."

Aðspurð hvort ákvörðun Árna um að stíga til hliðar dugi til að róa þær ófriðaröldur sem verið hafa í þingflokknum segir Þuríður: „Við skulum vona það besta. Við verðum að treysta því að þegar fólk er í stjórnmálaflokki vegna ákveðinnar lífsskoðunar, að það geti það unnið saman að framgangi þeirra skoðana. Einhendum okkur nú í það."