Lampard: Kæran mun gera Rooney enn hættulegri

Frank Lampard, miðjumaður Chelsea, hefur verulegar áhyggjur af því að Wayne Rooney mæti afar grimmur til leiks í Meistaradeildinni í kvöld i kjölfar kæru enska knattspyrnusambandsins.

"Wayne er afar mikill keppnismaður og það er aldrei gott að spila gegn honum. Þessi kæra gæti hvatt hann enn frekar til afreka. Menn verða oft grimmari og ákveðnari þegar það er skrifað illa um þá," sagði Lampard.

"Þessi kæra kom mér á óvart. Aganefndin tók samt sína ákvörðun og United verður að sætta sig við hana. Wayne er samt frábær leikmaður og á eftir að verða erfiður viðureignar."

Lampard mun spila sinn 500. leik fyrir Chelsea í kvöld og er aðeins fjórði maðurinn í sögu félagsins sem nær þeim áfanga. Hann kemst þar með í hóp með Ron Harris, Peter Bonetti og John Hollins.

"Þessu átti ég aldrei von á þegar ég kom hingað fyrir tíu árum," sagði hinn 32 ára gamli Lampard.