Landlæknir varar við fegrunaraðgerðum í heimahúsum

Landlæknir hvetur almenning til að vera á varðbergi gagnvart einstaklingum sem bjóða þjónustu sem augljóst má vera að stenst ekki þær lágmarkskröfur sem fólk að öllu jöfnu gerir til heilbrigðiskerfisins og starfsfólks hennar í frétt sem birtist á heimasíðu Landlæknaembættisins um fegrunaraðgerðir á heimili konu í Kópavogi.

Málið snýst um erlenda konu sem er sögð bjóða upp á bótox á heimili sínu í Kópavogi auk annarra fegurðaraðgerða.

Í frétt Landlæknaembættisins kemur fram að lögum samkvæmt beri landlækni að hafa eftirlit með heilbrigðisþjónustu og heilbrigðisstarfsmönnum. Sú starfsemi, sem hefur verið til umfjöllunar, fellur því ekki undir eftirlit embættisins og hefur verið veitt af einstaklingi án tilskilinna leyfa.

Svo segir í fréttinni að einstaklingar, sem sækja slíka þjónustu, gera það því á eigin ábyrgð. Sérstaklega er mikilvægt fyrir þá að huga að gæðum þjónustunnar, að hreinlæti sé tryggt og að sá sem veitir hana hafi nauðsynleg leyfi til starfseminnar.

Það efni sem notað er í bótox-fegrunaraðgerðir inniheldur lítið magn bótulínum, sem er þekkt eiturefni sem lamar vöðva og fjarlægir hrukkur tímabundið. Efnið getur haft hættulegar aukaverkanir ef það er ekki notað af fagfólki með þekkingu á lyfinu og verkun þess.

Lyfið er því háð markaðsleyfi sem Lyfjastofnun gefur út og innflutningur því ekki leyfilegur nema með sérstöku leyfi hennar.

Vísir greindi frá því á mánudaginn að lögreglan væri byrjuð að rannsaka málið vegna gruns um ólöglegt athæfi.