Sonur háttsetts yfirmanns í lögreglunni í haldi

Fimm karlmenn eru sagðir vera í haldi lögreglu eftir að kona ruddist inn á hótel erlendra fréttamanna í Trípólí í gær þar sem hún sagði menn á vegum Gaddafís einræðisherra hafa nauðgað sér. Konan mun vera við góða heilsu og er komin með lögfræðing.

Það var í gær sem þessar óhugnanlegu fréttamyndir bárust af konunni sem heitir Iman al-Obeidi þar sem hún æpti hástöfum og hélt því fram að sér hefði verið haldið í tvo daga af mönnunum. Þar hefði hún þurft að þola ofbeldi og nauðgun.

Það voru ekki síst viðbrögð starfsfólks hótelsins sem fengu heimsbyggðina til þess að gapa, en á myndböndum af atvikinu sást starfsfólk reyna að grípa fyrir munn hennar og að lokum var svartur poki settur yfir hana og hún flutt á brott.

Fyrstu viðbrögð stjórnvalda voru þau að konan væri veik á geði og í slæmu jafnvægi.

Erlendir fréttamenn hafa reynt að fá skýringar á afdrifum konunnar og sagði SkyNews fréttastofan frá því í dag að fimm menn hefðu verið handteknir vegna rannsóknar á málinu. Þar á meðal væri einn þeirra sonur háttsetts yfirmanns í lögreglunni.

Utanríkisráðherra landsins staðfesti að mennirnir væru í haldi í tengslum við mál konunnar en hann sagði atvikið hafa átt sér stað eftir að konan mælti sér mót við einn mannanna.

Hún sagði þó í gær að mennirnir hefðu flutt sig á brott þar sem þeir töldu hana vera úr hópi uppreisnarmanna frá Benghazi og sýndi hún áverka á bæði höndum og fótum sem hún sagði vera eftir handjárn.

Þá var haft eftir talsmanni ríkisstjórnarinnar að konan sé við góða heilsu og hafi fengið aðgang að lögfræðingi. Hann staðfesti einnig að málið væri litið mjög alvarlegum augum og það yrði rannsakað í þaula.