Allt í hnút í Karphúsinu

15. apríl 2011 22:20

"Það er engin niðurstaða í sjónmáli,“ segir framkvæmdastjóri Samtaka atvinnulífsins. Mynd/Vilhelm

„Þetta er mjög þungt. Ég er ekki bjartsýnn á framhaldið," segir Vilhjálmur Egilsson, framkvæmdastjóri Samtaka atvinnulífsins. Enn hefur ekki náðst saman í kjaraviðræðum aðila vinnumarkaðarins en fundahöld hafa staðið í Karphúsinu í allan dag. Búist er við að fundað verði fram á nótt. „Það er engin niðurstaða í sjónmáli," segir Vilhjálmur.

Unnið er að gerð skammtímasamnings eftir að hugmyndir um þriggja ára samning voru slegnar út af borðinu. Guðmundur Gunnarsson, formaður Rafiðnarsambandsins, sagði á bloggsíðu sinni í kvöld að Samtök atvinnulífsins hefðu slitið viðræðunum um langtíma samning á þeim forsendum að ekki hefði náðst samstaða um sjávarútvegsmál.

Heimildir fréttastofu herma að Samtök atvinnulífsins leggi sem fyrr áherslu á að ná niðurstöðu í sjávarútvegsmálinn áður en samkomulag verður undirritað og það þrátt fyrir að um skammatímasamning sé að ræða. Forsvarsmenn samtakanna vilja að samningsaðilar komi sér saman um harðorða yfirlýsingu um starfsaðferðir ríkisstjórnarinnar en á það hafa forystumenn ASÍ ekki viljað fallast.

Tengdar fréttir

Úthlutun aflaheimilda breytt í nýtingarheimildir

Ríkisstjórnin mun leggja fram frumvarp um breytingar á lögum um stjórn fiskveiða fljótlega í næsta mánuði. Frumvarpið felur í sér að úthlutun á aflaheimildum verði breytt í nýtingarheimildir samkvæmt samningum til afmarkaðs tíma. Samtök atvinnulífsins harma að ríkisstjórnin skuli ekki hafa nýtt það sem samtökin kalla einstakt tækifæri til að ná nauðsynlegri sátt um málefni sjávarútvegsins. Samtök atvinnulífsins hafa lagt fram tillögur um breytingar á fiskveiðistjórnunarkerfinu sem fela í sér útfærslu á samningaleið í sjávarútvegi, að því er fram kemur á vef samtakanna.

15. apríl 2011 20:03

Úrslitastundin í dag

Gengið verður frá kjarasamningum Alþýðusambandsins (ASÍ) og Samtaka atvinnulífsins (SA) í dag. Hvort samningarnir verða til nokkurra vikna eða þriggja ára ræðst af því hvort samkomulag næst í dag við ríkisstjórnina um sjávarútvegsmál, samgönguframkvæmdir og fleiri mál, samkvæmt heimildum Fréttablaðsins.

15. apríl 2011 08:00

Samið til tveggja mánaða

Kjaraviðræðum mun að öllum líkindum ljúka í kvöld. Framkvæmdastjóri Samtaka atvinnulífsins segir hugmyndir um þriggja ára samning út af borðinu. Samningurinn sem nú er rætt um í Karphúsinu mun gilda í tvo mánuði fyrst um sinn með möguleika á framlenginu.

15. apríl 2011 18:45

Ætla sér að ganga frá nýjum samningum í dag

Samningamenn Alþýðusambands Íslands og Samtaka atvinnulífsins halda fast við að ganga frá nýjum kjarasamningum klukkan korter yfir fimm í dag, þótt enn sé óljóst hvort samið verður til skamms tíma eða þriggja ára.

15. apríl 2011 12:37

Mest lesið

Fleiri fréttir