Lífið

Kenndi Óttari að upplifa heimalandið upp á nýtt

Sjá landið með nýjum augum Skötuhjúin Óttar M. Norðfjörð rithöfundur og Elo Vázquez ljósmyndari eyddu jólunum á Íslandi með vinum og fjölskyldu. Óttar er byrjaður að skrifa nýja bók og kvikmyndahandrit en Elo ætlar að halda ljósmyndasýningu á Kex Hostel í næstu viku.Fréttablaðið/vilhelm
Sjá landið með nýjum augum Skötuhjúin Óttar M. Norðfjörð rithöfundur og Elo Vázquez ljósmyndari eyddu jólunum á Íslandi með vinum og fjölskyldu. Óttar er byrjaður að skrifa nýja bók og kvikmyndahandrit en Elo ætlar að halda ljósmyndasýningu á Kex Hostel í næstu viku.Fréttablaðið/vilhelm
„Ísland er paradís ljósmyndarans og hvert sem maður lítur er að finna áhugaverð myndefni,“ segir ljósmyndarinn Elo Vázquez, en hún er unnusta rithöfundarins Óttars M. Norðfjörð og heldur sýningu hér á landi í næstu viku.

Elo hefur verið að munda myndavélina síðan hún var 12 ára gömul og hefur meðal annars myndað fyrir Elle og tímaritið Apartamento á Spáni. Hún tekur allar myndir á filmu og sérhæfir sig í að mynda réttu augnablikin og finna það sem er skringilegt í umhverfinu. „Ég reyni að fanga augnablikið og tek bara eina mynd af hverju viðfangsefni. Ef maður tekur margar, eins og á stafrænum myndavélum, er maður oft búinn að missa af því sem upphaflega var myndefnið,“ segir Elo og bætir við að eitt af því sem heillar hana við Ísland er hvað það er öðruvísi en heimaland hennar, Spánn. „Til dæmis eru litirnir á húsunum í Reykjavík skemmtilegir en á Spáni eru öll hús bara hvít.“

Óttar segir að Elo hafi kennt sér að sjá landið sitt upp á nýtt. „Það hafa allir gott af að sjá land sitt með augum útlendingsins en maður verður oft samdauna sínu nánasta umhverfi. Til dæmis fékk hún mig til að sjá fegurðina í hvítu plastheyböggunum sem eru á víð og dreif um landið á sumrin. Hún sagði að þeir væru eins og sykurpúðar, sem er alveg rétt hjá henni,“ segir Óttar, en hann og Elo kynntust fyrir sjö árum þegar þau stunduðu bæði nám í Skotlandi.

„Þetta er mjög alþjóðlegt samband hjá okkur,“ segir Óttar hlæjandi, en parið flakkar nú milli Íslands og Spánar, þar sem þau hafa bæði búið í Barcelona og Sevilla. „Við förum til Sevilla í janúar, en þar er heitt og gott núna. Annað en hér. En þó að við bölvum sköflunum núna er þetta frábært veður fyrir útlendinga að upplifa,“ segir Óttar, sem slær ekki slöku við þó að jólabókavertíðin sé yfirstaðin, því hann er þegar byrjaður á nýrri bók. „Það má segja að ég sé hálfgerður vinnualki. Ég er byrjaður á nýrri bók og langt kominn með kvikmyndahandrit ásamt Birni Brynjólfi Björnssyni og ónefndum leikstjóra úti í bæ. Það er því nóg af verkefnum fram undan.“

Ljósmyndasýning Elo, sem nefnist Elsewhere, stendur frá 6.-13. janúar á Kex Hostel.

alfrun@frettabladid.is






Fleiri fréttir

Sjá meira


×